Shillong, Nailur 06
U Bah Hamletson Dohling uba dei u nongai-buit jong u Myntri Rangbah ka Jylla, Conrad K Sangma bad uba dei ruh u MLA barim ka Mylliem Konstitwensi, u la ong ba ma u ryngkat ka seng NPP Mylliem Block ka pdiang sngewbha lada u Bah Ronnie V Lyngdoh uba dei u MLA ba mynta jong ka seng Congress un rung sha ka seng NPP.
Kane ka jingpynpaw u Bah Hamlet ka dei ha ka jingïakren bad ki nongthoh khubor hadien ka jingwan pynïasoh jong lai ngut ki MLA na ka Congress sha ka National People’s Party (NPP) ka la wanrah shisha ïa ka seng kaba skhem bad ruh ka dei ka sien kaba nyngkong ban ïoh haduh 31 ngut ki MLA ban ïalam syndon ïa ka synshar ka khadar hapoh ka jylla.
Kine lai ngut ki MLA Congress kiba la wan pynïasoh ki long u Bah Charles Marngar na Mawhati, Bah Gabriel Wahlang na Nongstoiñ bad Dr. Celestine Lyngdoh na Umsning.
Haba ki nongthoh khubor ki la bynrap biang ïa ki jingkylli, u Bah Hamlet u la ong ba lada jia ba u Bah Ronnie Lyngdoh ruh un rung sha ka NPP ka ïing jong ka NPP kan pdiang sngewbha, namar ka NPP ka dei ka seng kaba kylluid mynsiem. Haba ka pdiang ïa kiba rung ym tang ba ka plie tang ïa ka jingkhang hynrei kan plie naduh dohnud ïa kiba kwah ban pynïasoh ban wan ïatreilang na ka bynta ka bit ka biang jong ka jylla hi baroh kawei.
Nalor kane, u la ïathuh na ka liang ka NPP bad napoh konstitwensi ka la long kaba la pynkhreh na ka bynta ban ïakhun ïa ka ilekshon MDC lada kan wan ha kano-kano ka por.
U la ïathuh ruh ba napoh Mylliem konstitwensi kiba pan tiket ki la don haduh 6 ngut kiba kwah ïakhun ïa ka ilekshon MDC. Kumta na ka liang ka kynhun NPP ka shem jynjar ïano ban ai napdeng kine 6 ngut hynrei na ka liang ka ilekshon komiti ka la dep ban ïa shong haduh san sien bad ka la dep ban jied ïa uwei napdeng kitei 6 ngut kiba pan tiket bad shen yn sa pynskhem noh ha kine ki khyndiat sngi.
Ha kaba ïadei bad ka jingïakhun na ka bynta ka ilekshon MDC ka ban sa wan, u la ong ba u la rai ban nym ïakhun ïa ka ilekshon MDC namar u la dep kular ban ailad lang ïa kiwei pat ki para samla hapoh ka konstitwensi namar hapoh Mylliem kiba bun kiba la nang la stad bad kiba la shemphang.
