Shillong, Nailur 06
U Bah Hamletson Dohling uba dei u MLA barim ka Mylliem Konstitwensi bad mynta kum u nongai-buit jong u Myntri Rangbah ka Jylla, Conrad K Sangma ha ka Sngi Thohdieng u la leit ban plie ïa u mawnongrim ba 1 km tam ban shna ïa ka surok na Umlyngka-Mawdumdum -Nongkseh Syllei ka ban long ruh kum shi bynta ban pynkhreh ïa ka jingïaseng Synod ka ban long ha u Lber 2025 ha ka Balang Presbyterian Umlyngka.
Ha kane ka sngi la pynbna ruh ban maramot noh ïa ki surok shnong kaba 5 km ha ka jinglut baroh kaba kot haduh san klur sawphew lak tyngka tam.
U Bah Hamlet u la ïathuh ruh ba kum u MLA ka thaiñ naduh u snem 2022 u la ïalam ïa ki nongïalam balang ban ïakynduh ïa u Symbud Myntri Rangbah ka jylla u Bah Prestone Tynsong uba peit ïa ka tnad PWD Road ban ïoh ïa ka jingmynjur na ka bynta katei ka surok.
Shuh shuh u la ong ruh ba ha ka por ba u dang long kum u nongmihkhmat ka thaiñ u la wanrah shibun ka roi ka par hapoh Mylliem konstitwensi namar ba u kwah ban wanrah ïa ka roi ka par nokot.
U la ong ruh ba kampher lada ki briew kin kren ba u la rem ha ka ilekshon hynrei ka mynsiem ban shakri ïa ki paidbah ka konstitwensi ka nang shit rhem ban shakri.
Ha kane ka sngi la donlang ruh u Chief Engineer, Bah D Langstang, ki Rangbah Shnong ka Umlyngka, Pastor C Kharbuki na ka Balang Presbyterian, Rangbah Kur Thangkhiew bad kiwei kiwei.
