Nongstoiñ, Nailur 06
Ka jingbym pat lah jong u kontraktor ba pyntrei ïa ka surok Marngor haduh Phyllut, West Khasi Hills kaba don kumba 4km eiei, kumjuh ban pyndep noh ïa ka jingpyntrei haduh mynta wat hadien ba la sdang ïa ka jingpyntrei naduh u snem 2019, ka la pynlong ïa ka Hynñiewtrep Youths’ Council (HYC) Laitkseh Area Unit, ha ryngkat ka jingsynran lang ki nongïalam ka HYC Nongstoiñ Circle ba kynthup ïa u President, samla Redyfernandy Sun bad General Secretary, samla Ïainehskhem Ryntathiang ha ka 6 tarik u Nailur, 2024 ban ïakynduh ïa u Executive Engineer (EE), PWD Roads, Nongstoiñ Division, West Khasi Hills District ban dawa ba un shimkhia halor katei ka bynta .
Ki nongkitkam ka HYC Laitkseh ki la ong ba na ka liang ka seng ka la dawa na u EE ba un bthah ïa u kontraktor ba un wan ha ka ‘Joint Inspection’ ka ban sa khot da ka tnad namar haba pyrshang ban ïakren bad utei u kontraktor, u ai ki daw ba bun jait. Kumta la ong ba na ka liang u EE u la kular ban shimkhia ïa kane ka kam bad ong ruh ba wat ban pyndam noh ïa ka ‘tender’ jong utei u kontraktor ruh ym banse.
Shuh shuh ki la ong ba ka HYC kan nang ïai peit parman ïa kane ka kam bad lada kam urlong katkum ba la ïa kut, ka seng kan shim da kiwei ki lad ki lynti, namar kumba long mynta, katei ka surok ym lah shuh ban ïaid kali hynrei haba phai ha ki por bym pat trei ïa katei ka surok dang don hateng-hateng ba ki kali ki lah ban ïaid.
Ka HYC ka la kam ruh ba ka jingtrei ka dei 4 km hynrei haduh mynta, u kontraktor u dang pyntrei tang kumba 209 mitar – ha kaba ka por ruh ka la kut artad bad nalor ka jingtrei torti ka long shaba palat pud.
Ki nongkitkam ka HYC ki la ong ruh ba ka HYC ka kren shai ba lada utei u kontraktor um trei noh ïa ka kam, ka seng kam banse ban ai da kaba tyngeh.
