Imphal, Nailur:
Ki pulit jong ka Manipur ki la leit pan jingïarap na ka tnat shipai Army ha kaba ïadei bad ka jingai jinghikai pyntbit ïa ki pulit na ka bynta ban pyndonkam ïa ki 7.62 mm Medium Machine Guns (MMG), la ïathuh u heh pulit.
U Assistant Director (Administration) jong ka Police Training College ha Manipur u S. Gautam Singh ha ka shithi ba la phah sha ka Army’s 57th Mountain Division, u la ong ba namar ka jingbym don jong ka shongsuk-shongshngaiñ ha ka jylla, ki pulit ka jylla ki la thied noh da ka 7.62 mm MMG na Ordnance Factory, Jabalpur. U Singh ha ka shithi ba la phah kumba la pynpaw da ki nongthoh khubor, u la ong ba ki MMG ki la poi lypa ha ka jylla.
La pynpaw ba ki pulit jong ka Manipur kim shym don buit ne ïoh jinghikai kumno ban pyndonkam ïa kane ka tiar siat, ïa ka jingai jinghikai pyntbit lah ban ai ha Manipur Police Training College, Pangei da ki shipai jong ka kynhun 57th Mountain Division. Ka jingai jinghikai ka dei ban long na ka bynta ki 21 sngi kumba la buh jingtyrwa, ha kaba la thmu ban sdang ha ka 9 tarik, Nailur, la ong ka shithi.
Kumba la sakhi, la ong ba ki la don 2 ngut ki briew, kynthup ïa kawei ka longkmie kaba la 31 snem ka rta kaba la ïap, bad 12 ngut kiwei pat ki la mynsaw na ka jingshah thombor kumba la suba ba la leh da ki lehnoh jong ka kynhun ki Kuki ha kaba ki la pyndonkam da ki Drones bad ki tiar siat ba khlaiñ bor ha Sejam Chirang bad ha ki shnong ba marjan kiba don ha Koutruk jong ka Imphal West bad Imphal East distrik ha ka sngi U Blei bad ka Lah Sngi U Blei.
