Shillong, Nailur 06
Ka lympung ïalehkai Third Division Football League ba la pynïaid da ka Shillong Sports Association (SSA) ka la nangjam shaphrang ha kaba ka Mawpat SC bad ka Gorkha Association ki la khur ïa ka jingjop ha ka sngi Thohdieng ha madan Polo. Ha-kane ka jingïakhun ka Mawpat SC ka la pynliem noh ïa ka Krang SC haduh 8-1 kol.UKordinus Kharkongor u la khur ïa ka hat-trick da kaba thep saw kol ha ka minit kaba 18, 63, 65 & 70. Katba ïa kiwei pat la thep da u Alanson Thangkhiew (8), Jonathan Kharkongor (24),Tolammamee Mylliempdah (83) bad u Angelius-Nongrum (87). Na ka liang ka Krang ka la lah ban pynphai shi kol na ka daw ka jingbakla thep hi u rangïalehkai ka Mawpat u Daniel Shadap ha ka minit kaba 50.
Haba phai sha kawei pat ka jingïakhun kaba la long kham hashwa, ka Lumdiengjri SC ka la shah rem noh ha ka Gorkha Association da 1-6 kol.
U Yash Kanwar u la khur ïa ka hat-trick na ka bynta ka Gorkha hadien ba u la ïoh ban thep lai kol ha ka minit kaba 60, 70 & 80, katba u Aman Gurung u la thep ar kol ha ka minit kaba 29 & 88.
Na ka liang ka Lumdiengjri ka la lah ban pynphai kylla lyngba u Desilva Pyngrope (32) bad u Wallambok Buhsah (89).
Kane ka lympung kan bteng biang ha ka sngi Saitjaiñ ha kaba ka Sohïong SC kan ïakhun pyrshah ïa ka Umphrup SC ha ka por 12:30, katba ka Laitkyrkhong SC ia ka MLP F.T ha ka por 3:30 janmiet.
