Shillong, Nailur:
Kum shibynta ka jingrakhe ïa ka sngi kynmaw burom ïa ki nonghikai ha kylleng ka Ri India ne ka ‘Teacher’s Day’, ka Meribon KH Memorial College Sohïong ka la rakhe ïa kane ka sngi da kaba pynkup burom ïa ki 23 ngut ki khynnah pule kiba la pyndep ïa ka jingpule ha ka kyrdan ha ka ‘Graduate’ kiba la wan ha ki kyrdan ba shakhmat ha ki sobjek bapher-bapher napoh kane ka kolej.
Kane ka dei ka sien ba nyngkong ba ka Meribon College Sohïong ka la pynlong ïa ka jingpynkup burom na ka bynta ki khynnah kiba wan shakhmat.
Ha kane ka sngi, u Dr. Ricky AJ Syngkon uba dei u MP ka Shillong Parliamentary Constituency u la long kum u kongsan.
Haba ai jingkren, u Dr. Ricky AJ Syngkon u la ai ka jingkitbok-kitrwiang ïa ka kolej kumjuh ruh ïa ki samla pule jong kane ka kolej bad ong ruh ba kane ka sngi kan long ka sngi ka ban sah jingkynmaw ïa ki nonghikai, ki khynnah pule bad ïa ka kolej hi baroh kawei.
“Ka long kaei-kaei kaba sngewtynnad ban tip ba ka kolej naduh ba la seng ïa ka ha u snem 2015 bad kaba la sdang ïa ka jingïaid lynti jong ka ha u snem 2016, ka la pyndep haduh 8 snem ka jingïaid lynti da kaba ai ïa ka jingai jinghikai kaba bha, ka jingtei ïa ka jinglong jong ki khynnah pule bad nga thikna ba ka jingpynroi ïa ka jingtbit sha kiba bun ki khynnah pule naduh kaba sdang”, ong u Dr. Ricky.
Shuh shuh u Dr. Ricky u la ong ba u kyrmen skhem ba kane ka kolej kan dang aiti ïalade ha ka kyrdan kaba hakhlieh duh ban ai ïa ka jinghikai kaba bha tam lyngba ka jingpynbha ïa ki jingdonkam bad ki jingtei watla mynta kum ka kolej ka dang shibun ki jingduna kumba la pynpaw da ki nongpynïaid jong ka kolej.
“Nga thikna ba ka dei tang ka ka jingsdang bad nga thikna ba phin sa ïoh ïa kaei kaba phi dei hok lada phi don ka jingthmu bad lyngba ka jingaiti, ka jingtrei shitom bad ka jingkut jingmut jong phi, ki jingeh kiba phi la kdew mynshuwa, nga thikna ba kita ki jingeh baroh lyngba ka jingaiti bad ka jingkhlaiñ jong phi, kin sa pynlong ïa phi ba phin jop ïa ki jingeh”, bynrap u Dr. Ricky.
U la kyntu ïa ki samla pule ba kin long kiba sngewrit, kiba don ka jingkitkhlieh bad kiba ïai minot thop ha ka jingpule bad ba kim dei ban klet ïa kaei kaba ki la ïoh jinghikai na kane ka kolej da kaba ngeit ha u Blei nongbuh nongthaw u ba lah ban ïarap ha kiba bun ki jingeh.
La don ryngkat ha kane ka sngi da ki nonghikai, ki khynnah pule ryngkat ki kmie ki kpa, ki bahaïing-hasem bad ki khun ki kti u Bah HDR Lyngdoh (bam kwai ha dwar U Blei) uba dei u MLA barim ka Sohïong Constituency nalor kiwei-kiwei.
Ha kane ka sngi, ka la don ruh ka jingpynbyrngia da ki jingrwai bad jingshad tynrai ba la shim bynta da ki khynnah pule jong kane ka kolej.
