Shillong, Nailur 06
Ka jingbuh jingtyrwa ka Sorkar Jylla sha ka Sorkar Pdeng ban ai jingmynjur ba mang pisa ban tei ïa ka Veterinary Hospital ha Upper Shillong kam pat urlong namar haduh mynta khlem pat ïoh ka jingmynjur ban mang pisa.
Ka Sorkar Jylla ka la phah ïa ka jingbuh jingtyrwa ha ka jingmang pisa kumba T.32 klur hynrei hadien ba la khmih biang, ka Sorkar ka la rai ban phah biang da kawei ka jingbuh jingtyrwa kaba kot sha ka T.100 klur ban tei ïa ka hospital.
U Myntri ka tnat Animal Husbandry & Veterinary, u Bah A.L Hek u la ong ba ka Jylla ka dang ap na ka Sorkar Pdeng ban ïoh tei ïa ka Veterinary Hospital ha Upper Shillong.
La ong ba kane ka jingtyrwa ka sahkut mynta ha NITI Aayog bad ka tnat ri jingri ka Sorkar Pdeng namar ka dang khmih bniah ha shwa ban ai ka jingmynjur.
Kane ka projek la tyrwa ban mang lyngba ka PMDivine hapoh ka tnat DoNER ka Sorkar Pdeng.
