Shillong, Nailur 06
Ka Myngken Christian HSS kan pynkhreh ïa ka jingïakhun quarter final pyrshah ïa ka CISCE (Minerva Punjab) ha ka lympung ïalehkai 63rd Subroto Cup International Football Tournament ka ban long ha ka sngi Saitjaiñ ha ka por 8:30 mynstep ha nongbah Delhi.
Kane ka kynhun ïalehkai Under-17 kaba na Bhoirymbong ka la lah ban jam sha katei ka kyrdan hadien ba ka la wan ha ka kyrdan ba hakhlieh jong ka Group-F da kaba ka la kamai 9 point na ki lai sien ïakhun.
Lah ban pynkynmaw ba ha ki jingïalehkai ba la lah jong katei ka group, ka Myngken ka la lah ban pynliem ïa ka Dadra and Nagar Haveli and Daman and Diu (DD&DNH) haduh 23-0 kol, 1-0 kol ïa ka Chandigarh bad da 5-0 kol ïa ka Bihar.
Kumta kane ka kynhun ïalehkai ka Jylla ka donkam ban ïalehkai bha ha kane ka jingïakhun khnang ban pynthikna ban jam sha ka semi final.
