Shillong, Nailur:
U Deputy CEM ka Khasi Hills Autonomous District Council (KHADC) u Bah Pynshngaiñ N Syiem uba dei ruh u nongïalam ka Congress u la kam ba ka jingmih noh dang shen jong ki katto katne ngut ki MLA bad MDC na ka seng ka la ktah ïa ka Congress bad pynduh mynsiem ïa ki nongkyrshan jong ka.
Haba kren ha ka sngi Palei, u Bah PN Syiem u la kubur ïa ka jingtynjuh hynrei u la kdew pat ba ki paidbah ki nang kham noh jar jar sha ka Congress haba ïanujor bad kiwei pat ki seng.
U Bah Pynshngaiñ u la pynpaw ba ka seng ka lah ban shem jingeh ban wad ïa ki kyrtong kiba biang ha ki katto katne ki constituency na ka bynta ka ilekshon MDC ka ban wan, hynrei u la ban jur ba kin jied bha ïa ki nongïakhun kiba khlaiñ, khamtam ha ki konstitwensi kiba kim shym la jop ha ka ilekshon ba la dep. Ha ki jaka kiba don ki MDC barim, u ngeit skhem ba ka Congress ka dang don ka lad kaba biang ban jop.
Ha kaba ïadei pat ba ka khubor ba ka lah ban don ka jingbujli ïa u nongïalam ka Meghalaya Pradesh Congress Committee, u Bah Pynshngaiñ u la pynpaw ba kam shym la don satia kano kano ka jingïakren halor kane, bad ka Congress ka dang ïai kyrshan ïa u President ka MPCC u Bah Vincent H Pala.
Haba kylli pat halor ka shithi ne ‘legal notice’ ba la phah da ki muktiar jong u Symbud Myntri Rangbah ka jylla u Bah Sniawbhalang Dhar sha u Bah Vincent H Pala ban dawa ba u dei ban siew T.100 klur bad ban panmap khlem buh kyndon halor ki jingkynnoh pyrshah ïa u Bah Sniawbhalang, u Bah Pynshngaiñ u la kyntait ban kren ne kynthoh eiei halor kane.
