Shillong, Nailur 08
Ka Saipung Block Sports Association bad ka Mawshynrut Sports Association ki la long ki kynhun kiba kynsai ha ka jingïalehkai kaba phra jong ka Meghalaya Youth League 2024 ba la pynïaid da ka Meghalaya Football Association ha ryngkat ka jingkyrshan lang ka tnat ïalehkai jong ka Sorkar Jylla.
Ha ka kyrdan U-14 jong ka Zone-B, ka West Jaiñtia DSA bad ka Amlarem BSA ki la jop da 4-0 kol bad 6-0 kol pyrshah ïa ka Laskeiñ bad ka Saipung.
Hynrei haba phai sha ka U-16, ka Saipung ka la pynliem ïa ka Amlarem da 3-1 kol na ka bynta ban jam sha ka kyrdan ba-ar ha katei ka group. Katba ka West Jaiñtia ka la jop arsien da 7-1 kol ïa ka Laskeiñ.
Ha ka Zone-C, ka Sohra SA ka la ïoh ïa ka jingjop kaba nyngkong ha kane ka lympung hadien ka jingjop da 2-1 kol pyrshah ïa ka Riwar Mihngi FA ha ka U-14. Kane ka long tang ka jingïakhun kaba nyngkong ha kane ka kyrdan jong ka Zone-C ha kane ka taïew.
Hynrei ka Riwar Mihngi ha ka jingïakhun U-16 ka la jop da 3-1 ïa ka Sohra bad ka la tam ïa ka Western Ri-Bhoi SA na ka jingïoh poiñ. Lah ban kdew ba ka Western Ri-Bhoi ka la shah rem ha ka Ri-Bhoi DSA da 2-0 kol.
Ha ka Zone-D, ka Nongstoiñ DSA ka la jop da 2-1 kol ïa ka Pyndengumïong DSA ha ka kyrdan U-14, katba ka Mawkyrwat DSA ka la jop da 1-0 kol ïa ka Eastern Border SA. Ka jingïakhun hapdeng ka Tyrsad ASA pyrshah ïa ka Mawshynrut ka la kut noh ha ka jingïakhaid khlem don ba lah ban thep kol.
Ka jingïakhun U-16, ka Mawshynrut ka la pynliem ïa ka Tyrsad Area da 3-2 kol. Ka Eastern Border ka la lah ban pynliem noh ïa ka Mawkyrwat da 5-3. Ka Pyndengumiong ka la ïakhaid mar 2-2 kol bad ka Nongstoiñ. Katba ka Mawshynrut ka la kiew ar kyrdan sha ka kyrdan kaba lai da ka jingjop jong ka ïa ka Tyrsad Area da 3-2 kol.
