Shillong, Nailur 08
Ka Sohïong SC bad ka Umphrup SC ka la ïasam mar shi point ha ka lympung ïalehkai Second Division Football League ba la pynïaid da ka Shillong Sports Association, hadien ba ki la ïakhaid mar 2-2 kol ha ka Sngi Saitjaiñ.
Ha kane ka jingïakhun kaba la long ha SSA Stadium kaba ha First Ground, Polo, baroh ar ki kynhun ki la pyrshang ban ïakhun tyngeh naduh kaba sdang. Hadien shiteng kynta ka Umphrup ka la ïoh ban pynkhih jar nyngkong eh lyngba u Fredy Kharbyngngar ha ka minit kaba 34. Kane ka kynhun ka la pynbud biang ïa ka kol ba ar lyngba u Bannangkiew Khriem (47) na ka bynta ban tam 2-0 kol.
Wat la ka Sohïong ka la shah thep ar kol, hynrei ka la pyrshang ban ïakhun tyngeh bad ha shwa ban wai ka la lah ban pynïakhaid kylla. Kane ka la wan urlong lyngba u Batipskhem Wahlang ha ka minit kaba 86 bad u Wamboklong Kharshileit ha ka minit kaba 90+2.
Haba phai sha kawei pat ka jingïakhun kaba ar, ka Laitkyrkhong SC ka la ïakhaid mar 1-1 pyrshah ïa ka Meghalaya F.T.
Ha kane ka jingïakhun ka Laitkyrhong ka la ïoh ban pynkhih jar nyngkong eh lyngba u Learningstar Warlarpih ha ka minit kaba 20, hynrei hadien shiteng kynta ka MLP ka la lah ban pynïakhaid kylla lyngba u Aldrin Monlang Ramsiej ha ka minit kaba 33.
Ka jingïalehkai ha ka lah sngi U Blei kan long hapdeng ka Lumshyiap SC pyrshah ïa ka Pay For Right F.A ha ka por 12:30, katba ka Mylliem Lum SC ïa ka Marbisu SC ha ka por 3:30 janmiet.
