Jowai, Nailur 08
Ka Evergreen SC ka la ïoh jingjop ha ka 8th Invitation Knockout Football Tournament ba la pynïaid da ka Wahïajer Sports Club hadien ba ka la lah ban pynliem ïa ka Brother United lyngba ka tie-breaker da 3-2 kol ha ka Sngi Saitjaiñ ha madan Wahïajer Sports Complex.
Ha katei ka jingïakhun baroh ar kynhun ki la ïakhun tyngeh naduh kaba sdang ha kaba ki la kut ha ka jingïakhaid mar 2-2 kol. Na ka Brother United la thep kol da u Wanbha War ha ka minit kaba 4 bad u Pynkhliañ Nongrum (58). Katba ka Evergreen ka la lah ban pynphai kylla ar kol lyngba u Wompher Phawa (13 & 38).
Kane ka lympung kan bteng biang ha ka 12 tarik mynta u bnai hapdeng ka Ummulong SC pyrshah ïa ka Mission SC Mawryngkneng ha ka por 2 baje nohphai sngi.
