Jowai, Nailur 08
Ka Mulang Ïalong ka la rah ïa ka nam lahduh ha ka lympung ïalehkai 3rd Division Football Tournament (4th Adelbert Laloo Memorial Trophy) ba la pynïaid da ka West Jaiñtia District Sports Association (WJDSA) hadien ba ka la lah ban pynliem noh ïa ka Loomsooiung Newhill da 1-0 kol ha ka jingïakhun final kaba la long ha ka Sngi Saitjaiñ.
Katei ka jingïakhun kaba la long ha Kiang Nangbah Stadium, Jowai la sakhi ba ka la long kaba ïathaiñ bad ïabiang bor bha ha kaba baroh ar kynhun kim shym la lah ban pynkhih jar. Kumta, na ka liang ki bor pynïaid ki la rah sha ka extra time bad dei ha ka minit kaba 93 ba u Richard Dhar u la ïoh ïa ka kabu ksiar na ka bynta ban pynurlong ïa ka Mulang Ïalong ban rah syndon ïa ka nam jop.
Da kane ka nam jop u Richard u la ïoh ban khur ïa ka nam Man of the Match, ïa ka nam Top Scorer la khur da u rangïalehkai ka Myrjai u Elad Dhar, uba la thep haduh 10 kol ha kane ka lympung, ka nam Best Goalkeeper ka la leit sha u rangapkol ka Newhill u Confirm Bang bad ka khusnam ‘Player of the Tournament’ sha u Nidaroi Mulieh jong ka Mulang Ïalong.
Ha kane ka sngi la donlang u Bah C. Tympang Laloo, President ka Kur Laloo Jowai kum u kongsan, kumjuh u DSO West Jaiñtia Hills Bah Khroobok Passah, ki nongïalam bad dkhot nongkitkam ka WJDSA kynthup u Working President Bah EMH Passah, kiba haïing hasem jong u (L) Adelbert Laloo nalor kiwei kiwei kumjuh ki paidbah nongkyrshan na baroh ar ki kynhun.
