Imphal, Nailur:
U Myntri Rangbah jong ka Manipur u N Biren Singh, ha ryngkat ka jingdonlang jong ki 18 ngut ki MLA, ki la ïakynduh ïa u Lat jong ka jylla u L Acharya ha ka step jong ka Sngi U Blei ha ka por ba dang jur bha ki kam pyntriem ha ka jylla.
U Myntri Rangbah bad ki MLA, ki Myntri kynthup u Basanta, Ranjan, Susindro, Govindas, Awangbow Newmai, Kashim Vashum, bad ki MLA u Loken, Kongkhan Robindro, bad Nalini, napdeng kiba bun kiwei pat ki la poi ha Raj Bhavan ha ka por 11 baje mynstep bad pynlong ïa ka jingïalang bad u Lat. Ha kaba ïadei bad kane, ka Assam Rifles (AR) ka la pyntreikam ïa ki rukom treikam ban pyrshah halor ki Drone jong ki nongshun ha Manipur bad shuh shuh ban pyndonkam da ki Anti-Drone Gun hapoh ka jylla ïa kaba la wanrah da ka tnat Central Reserve Police Force (CRPF) kum shi bynta ban buh jingshngaiñ hapoh ka jylla.
Ha ka jingpyllait khubor ha ka rynsan phah khubor ha ka X, ki pulit jong ka Manipur ki la ong, “Ki shipai AR ki la pyntreikam ïa kumba katto katne ki rukom pyntreikam ban pyrshah ïa ki Drone jong ki nongshun ha ka jylla ha ki thaiñ kiba kham ap jingma ban lait na ki jingthombor jong ki Drone kiba nabar. Ka tnat pulit CRPF ki la dep ban khmih bniah halor ka Anti-Drone System bad aiti ïa ka sha ki shipai na ka bynta ban pyntreikam ha ka jylla. Kin sa don shuh sa kumba katto katne ki Anti-Drone Gun ki ban wanrah sha ka jylla da ka tnat CRPF shen.”
