Shillong, Nailur 09
Ka hat-trick ba la ïoh da u Banganson Nongphlang ka la biang pura ïa ka Mynken Christian Higher Secondary School ban jam sha ka final ha ka sien kaba nyngkong eh ha ka Under -17 jong ka lympung ïalehkai 63rd Subroto Cup International Football Tournament 2024.
Kane ka la wan urlong hadien ba ka ka lah ban pynliem noh ïa ka Govt. Higher Secondary School kaba na Arunachal Pradesh haduh 7-0 kol ha ka jingïakhun semi final kaba la long ha ka Lah Sngi U Blei ha Tejas Football Ground kaba ha nongbah Delhi.
Ha kane ka jingïakhun u khlur ïalehkai ka Jylla u Banganson Nongphlang u la ïoh ban thep marwei haduh lai kol, u Alicestar u la thep ar kol, katba u Mebanlamlynti bad u Mebankhraw ki la ïoh ban thep mar shi kol.
Lyngba kane ka jingjop ka Mynken kan pynkhreh ïa ka jingïakhun final ha ka 11 tarik pyrshah ïa ka T.G English School kaba na Manipur, kaba la lah ban pynliem noh ïa ka Sri Lanka Schools Football Association da 1-0 kol ha kawei pat ka jingïakhun semi final kaba la long ha kane kajuh hi ka sngi. Kane ka shi kol ka la wan lyngba u Heroba uba la thep ha ka minit kaba 27.
Haba phai sha kane ka jingïakhun ki rangïalehkai ka Mynken ki la lah ban ïalehkai bha naduh kaba sdang ha kaba la ïoh ban pynkhih jar nyngkong eh lyngba u Banganson ha ka minit kaba 21. Hadien shiteng kynta une u rangïalehkai u la pynbud biang ïa ka kol ba ar ha ka minit kaba 35 na ka bynta ban tam 2-0 kol ha ka kylla step.
Hadien katto katne ba la bteng ïa ka jingïakhun jong ka kylla miet ka Mynken ka la ïoh ban thep biang ïa ka kol ba lai lyngba u Mebanlamlynti ha ka minit kaba 39. Hadien san minit kane ka kynhun ïalehkai kaba na Ri Bhoi ka la thep biang ïa ka kol ba saw lyngba u Alicestar.
U Banganson u la ïoh syndon ïa ka hat-trick da kaba thep ïa ka kol ba lai ha ka minit 46 na ka bynta ban pynlong ïa ka Mynken ban tam biang da 5-0 kol.
U Alicestar u la thep biang ïa ka kol ba ar ha ka minit kaba 51 bad ïa ka kol kaba khatduh la thep da u Mebankhraw ha ka minit kaba 64. Kane ka la pynlong ïa ka Mynken HSS ban jop syndon hadien ba ka liang pyrshah kam shym la lah ban pynphai wat tang shi kol ruh haduh kaba kut jong ka jingïalehkai.
