Shillong, Nailur 09
Ka kynhun ki nongïalehkai Muaythai ka Jylla hapoh ka lama jong ka Muaythai Association of Meghalaya ki la mih ban leit shim bynta ha ka lympung ïalehkai ba la tip kum ka IFMA Youth World Championship Muaythai ka ban long ha Thailand.
Kane ka lympung kan sdang naduh 11 tarik haduh 20 tarik mynta u bnai ha Bangkok kaba ha Thailand.
Kumta ha shwa ka jingleit jong ki sha katei ka ri, ha ka 6 tarik mynta u bnai kane ka kynhun ka la leit ïakynduh ia u Bah Banteidor Lyngdoh, MLA ka Mawkynrew Constituency bad Myntri barim ba dei khmih ïa ka tnat ïalehkai bad uba long kum u Chief Patron ha kaba u la ai ka kitbok-kitrwiang ïa kine ki khynnah ba kin lah ban ïalehkai bha bad wanrah burom ïa ka jylla.
Ha ka jingshisha ki don haduh 10 ngut ki khynnah ïalehkai kiba la shah jied sha katei ka lympung ïakob, hynrei na ka daw ka jingbym don pisa ka la pynlong ïa ki lai ngut ba kin sangeh noh na ka jingleit shim bynta bad haduh mynta ki don sa tang 7 ngut.
Ïa kine ki khynnah ïalehkai la jied hadien ba ki la lah ban ïalehkai bha bad khur takma na ka National Muaythai Championship ba la pynlong ha Laxmi Bai Physical Education Tapesia, Sona-pur jong ka jylla Assam ha u bnai Jymmang mynta u snem.
Ka kynhun ki khynnah ki ban ïashim bynta ki long ka Dasngewtngen E. Nongrum, ka Alphonsa Ziania Wriang, ka Mary Christine Wriang, ka Aitilin Kharbyngar, ka Jenefer Mukhim, ka Madona Taro, u Teiboklang Marbaniang, u Dameshuwa Marten, u Bansahnamkyrpang Warkhyllew bad u Andy Taro.
Ïa kane ka kynhun la ïalam da u Bah Angelus Sun, Secretary ha ryngkat u Bah Pynsuklang Sumer uba dei u Judge bad Refree.
Nalor kine, u samla Skhemborlang Marweiñ, uwei na ki samla ba paw-khmat na kum kine ki jingïakob ïakhun Muaythai un leit lang bad kane ka kynhun sha Thailand ban ïa aireng pat ha lai tylli ki lympung ïakob ha Bangkok.
