Shillong, Nailur:
U MDC ka Nongkrem, Bah Lambor Malngiang u la ong ba ïa mynta un bteng shuwa ban long kum u MDC shimet hapoh Khasi Hills Autonomous District Council (KHADC).
“Kumba long mynta hi, kaba paw shai ka long ba nga sah hi kum u MDC shimet bad ngan ïai bteng shuwa ban long kum u MDC shimet,” ong u Bah Malngiang haba kren sha ki lad pathai khubor ha ka Sngi Saitjaiñ.
U la ong ruh ba ka ilekshon kam shong ha kano-kano ka seng saiñ pyrthei hynrei ha u briew bad ka jingïadei jong u bad ki paidbah.
“Ïa mynta hi nga sngew ba ngan ïai bteng ïa kane ka jingïaid lynti jong nga kumba nga ju ïaid baroh shi katta, ban dang bteng kum u MDC shimet namar ngi donkam ïa u briew u ban ai ïa ka jingshakri ïa ki paidbah. Na kata ka daw ngan ïai bteng shuwa ïa kane ka lynti jong nga kaba nga ïaid mynta,” u la ong.
Haba ïadei bad ka ilekshon MDC, u la ong ba hadien ba la dep pynbeit ïa ki shnong ki thaw, na ka liang jong u, um don eiei ban kynthoh ïano-ïano namar ka saiñ hima-sima ka kylla na ka por sha ka por bad ïa kane ym lah lait naba kane ka jia ha India baroh kawei.
Haba kylli, u la ong, “Ki ïakren ïa kata ka jingkylla…ban ong ba ka don ka lyer ba beh jong ka VPP, ngam tip lehse shawei ka beh ne kam neh, kata ngim lah ban batai hynrei nga, nga peit beit ïa kaei kaba ngi dei ban peit ïa ka konstitwensi lajong.”
U la ong ruh ba ha ka jingïaleh, ka rem ka jop ka don beit hynrei kam dei pat ban shu rem sah bad kumba ka long, ki paidbah ki dei kiba la shai la stad bad dei ma ki, ki ban ai ka jubab hadien jong ka ilekshon ynda la pynbna ïa ka risol.
“Ban ïakren lypa mynta ba ka long ha kata ka dur, namar ka jingkylla hi ka mut ka dei lyngba ki kam ki jong phi…kiei kita ki jingkylla…ka mut phi wanrah ïa ka jingkylla ha ka leit ka wan kaba pynsuk ïa ki paidbah nongshong shnong,” u la ong.
Haba ban jur ba ki kam kiba trei ki wanrah ïa ki jingkylla, u MDC u la ai nuksa ba ha shuwa, lada peit ïa ka lynti na Laitkor sha Pomlakrai bad na Pomlakrai sha Laitlyngkot, ka surok ka long kaba khohruh-khohram bad kaba la shu maramot shi maramot na ka por sha ka por.
“Hynrei mynta ynda phi leit ban peit hadien ka jingjop jong nga, mynta ka long ka ‘Double-Lane’, kata ka dei ka jingkylla. Dei halor kine kiei-kiei baroh kiba ngi la pyrshang ban leh, mut ka la kylla dur ka konstitnwensi ha kine ki 5 snem kiba la leit ïa kaba nga la pyrshang ban leh ïa kaba bha tam lyngba ka jingshakri kaba bha tam,” u la ong.
Shuh shuh u Bah Malngiang u la bynrap ba haba phai sha ka ilekshon MDC, u ieh ïa ka rai ha u paidbah u ban sa jubab hi ha ka por kaba biang.
