Nairobi, Nailur:
Ki pulit ka Kenya ha ka Sngi U Blei ki la iathuh ba kawei ka jingjia pluh ding, ka la bam duh ia kawei ka kamra thiah jong kawei ka skul ha Kenya ha ka Sngi U Blei. Kane ka dei ruh ka jingjia kaba lai tang hapoh jong katto-katne sngi.
Kane ka la jia ha ka skul Njia Boys High School kaba don ha pdeng jong ka jylla Meru, ha kaba kynsan katei ka iing skul ka la kem ding katba ki khynnah skul ki dang ia bam ja miet bad ka long kaba donbok pat ba ym shym la don mano- mano ruh ba mynsaw ne ngat ha katei ka jingjia.
Katei ka iing kaba don kumba 150 ngut ki khynnah pule, la ong ba ka la ingkhong lut bad baroh kiei-kiei kiba don hapoh ki la um lut. Hynrei, ia ka daw jong katei ka jingkem ding ym shym la tip satia.
La ong ba, ha ka Sngi Palei jong kane ka taiew ba la leit, 21 ngut ki khynnah shynrang ki la duh ei noh ia ka jingim jongki, ha ka jingpluh jong ka kamra thiah ha Hillside Endarasha Academy kaba don hapoh Nyeri County, katba ki dang thiah ha katei ka miet.
Kumjuh ruh ha ka Sngi Saitjain ruh, la mih sa kawei pat ka jingpluh na ka jingbthei ha kawei ka skul heh jong ki khynnah kynthei ha Isiolo county, kaba don ruh ha ka phang pdeng jong katei ka ri.
Uwei u heh jong katei ka jaka u la iathuh ba ki don katto katne ngut kiba mynsaw, hynrei na ka liang ki pulit pat, ki la iathuh ba ym shym la don mano- mano ba mynsaw ne shah ktah ha katei ka jingjia.
