Mumbai, Nailur:
U nongialam jong ka Maharashtra Bharatiya Janata Party (BJP) uba dei ruh u MLA barim jong ka Gondia u Gopaldas Agrawal ha ka Sngi U Blei u la ong ba u la mih noh na ka seng bad un sa pynïasoh sha ka Congress ha ka 13 tarik, Nailur, la ïathuh ka tyllong khubor.
Ha ka jingai jingkren ha ka jingïalang bad ki nongthoh khubor, une u MLA barim na Gondia u la ong ba u mih noh na ka BJP da ka dohnud kaba khia namar ba ki rukom pyntreikam jong ka kim long kiba lah ban pdiang bad ki nongbud ka seng kim shym la trei da ka jingaiti kaba pura na ka bynta jong u.
“Nga la phah ïa ka shithi iehnohkam na ka jinglong dkhot jong ka BJP ha ka shithi sha u President jong ka seng u JP Nadda. Nga la rung sha ka BJP ha u snem 2019 ban ïakhun ïa ka ilekshon Assembly hynrei nga la shah rem ha u kyrtong shimet u Vinod Agrawal namar ka jingbym ïatreilang na ka liang jong ki nongbud jong ka seng,” la ong u Agrawal uba la jop na katei ka shuki da ka tiket Congress ha ki snem 2004, 2009 bad 2014, la ïathuh ka tyllong khubor.
“Nga la shah pynbor ban iehnoh kam da ka dohnud kaba khia. Nga la kren ruh halor ka rai jong nga ha u Symbud Myntri Rangbah u Devendra Fadnavis bad u President jong ka BJP ka jylla u Chandrashekhar Bawankule. Ngan leit phai biang sha ka Congress ha ka 13 tarik, Nailur ha ka jingdonlang u Ramesh Chennithala uba dei peit ïa ki kam ba ïadei bad ka seng ha Maharashtra, ” u la ïathuh ha ki nongthoh khubor, katkum ka jingpynshisha jong ki lad phah khubor.
U la kam ba ki heh nongïalam jong ka seng kiba kynthup ïa u Ramesh Chennithala bad kiwei ki la ong ba ka Congress kan ïakhun na Gondia ha ka ilekshon Assambly 2024 ha Maharashtra kum shi bynta jong ka Maha Vikas Aghadi (MVA) hynrei u la bynrap ba um rung sha ka seng bahashwa jong u na ka bynta ban ïoh tiket, la ïathuh ka kynhun jong ki lad pathai khubor ha ka sngi U Blei.
Ka All India Majlis-e-Ittehadul Muslimeen (AIMIM) ka la sahteng ban ai jubab halor ka jingtyrwa sha ka MVA na ka bynta ka jingïatehlok ha ka kam ilekshon hahswa ka ilekshon hapoh ka jylla. Hynrei lada ka kynhun synrop jong ka liang pyrshah kam jubab haduh ka 9 tarik, Nailur ka AIMIM kan ïaid laitluid, la pynbna u nongthaw aiñ ka seng u Imtiaz Jaleel ha ka sngi Saitjaiñ.
U Jaleel u la pynpaw ba ka AIMIM ka angnud ban ïakhun ïa ki katto katne ki shuki ba la jied ha kaba ka seng kaba don ha Hyderabad ka don ka jingktah kaba khraw, ong ka tyllong khubor. Haba kren sha ki lad pathai khubor ha Nagpur, u la ban jur halor ka jingthmu jong ka seng ban khanglad ïa ka kynhun synrop Mahayuti ba la ïalam da ka BJP, kaba kynthup ïa ka Shiv Sena jong u Eknath Shinde bad ka Nationalist Congress Party (NCP) jong u Ajit Pawar, ban bat ïa ka bor ha ka jingthep vote ha ka ilekshon Assembly ha Maharashtra.
Wat la ka AIMIM bad ka Shiv Sena jong ka kynhun u Uddhav Balasaheb Thackeray ki don ka jingïapher jingmut, hynrei u Jaleel u la batai ba ka AIMIM ka kloi ban ïatehlok bad ka MVA namar ka “jingpynbor ha ki kam saiñpyrthei” bad na ka bynta ka jingbha jong ki nongrep bad ki paidbah ka Maharashtra.
