Khliehriat, Nailur 10
U Deputy Commissioner bad Chairman District Disaster Management Authority ka East Jaiñtia Hills District, u la bthah ïa u Project Director jong ka National Highway Authority of India (NHAI) Meghalaya, Shillong ban shim mardor ïa ki lad ki lynti ban pynbha pat ïa ki jingkieng kiba don ha lynter ka surok bah NH-6.
Ïa kane ka jingbthah la pynmih hadien ba la ïoh ïa ka kaiphod ha kaba ïadei bad ka jingsniew jong ki jingkieng kiba don ha lynter ka surok bah NH-6 ha ka shnong Tongseng, Sonapyrdi, Pyrtakuna, Umkiang, bad ka shnong Ratacherra kaba hap hapoh ka Lumshnong C&RD Block kaba lah ban wanrah ka jingma kaba khraw na ka bynta ki paidbah bad ki kali kiba kit ïa ki paidbah nongleit nongwan.
Khnang ban ïada ïa ki nongleit nongwan, ki kali bad ki paidbah kiba ïaid lyngba kane ka surok bah National Highway na kino-kino ki jingjia ki bym sngewtynnad, la kyntu ïa ki paidbah, ki nongleit nongwan bad ki nongñiah kali ban shim ïa ki lad jingïada kiba donkam bad ban kohnguh ïa ki kyndon pynïaid kali haba ki ïaid lyngba ïa ki jingkieng ba la kdew khnang ban ban lait na kano kano ka jingjia bym sngewtynnad tad haduh ban da dep ki kam da ka tnat ba dei peit jong ka NH-6.
