Shillong, Nailur 10
Ka Meghalaya Trader Fresh Vegetables and Ginger Association (MTFVGA) ka la kyrpad na ka Khasi Hills Autonomous District Council (KHADC) ba kan pynsangeh noh mardor ïa ki khyrdop jong ka kiba lum pisa na ki kali kit mar rep.
Ha ka jingthoh ba la phah sha u Executive Member (EM) ka tnat Revenue bad EM ka tnat Forest jong ka KHADC, ka MTFVGA kaba kynthup ïa ka Khasi Jaiñtia Food Vegetables Supplier Association, ka Ïewduh Khasi Pnar Association, Shilliang Um Farmer and Traders Association, Fresh Green Ginger Association Ri-Bhoi ka kyrpad ban pynsangeh noh mardor ïa ka jinglum pisa jong ki khyrdop ka District Council kaba la pynïeng harud surok ha Mawlyndep, Umbir ka surok kaba ïaid na Umïam ban mih sha Mawmaram.
Katei ka Synjuk ha ka jingthoh ba la soi da u President u Bah Bristar Mawthoh bad General Secretary Bah Ferdinand Mawrie ïa kaba la phah sha ki EM, bad ba la ai kopi ruh sha u CEM, ka la pyntip ba ki don haduh lai tylli ki khyrdop ba la pynïeng da ka District Council bad nalor kane, la ong ba wat ka khyrdop ka tnat Forest ka KHADC ruh ka lum pisa na ki kali mar rep, ïa kaba ki la lap katkum ki slip lum pisa.
Katkum ki slip ne receipt ba la ai sha ki nongñiah kali, la lap ba ka jinglum pisa ka long 300 bad 200 tyngka da ka khyrdop jong ka District Council bad ruh ka tnat Forest jong ka Mylliem Syiemship.
Kumta, na ka liang ki Nongïalam ka Synjuk ki la ong khnang ba kan ym ktah ïa ki nongrep bad ïa ki nongkhaïi, na ka liang ka synjuk ka kyrpad ban pynsangeh noh mardor ïa kitei ki khyrdop bad ban sangeh noh ka jinglum pisa na ki kali kit mar rep.
