Berlin, Nailur:
Katkum ki khubor, la ong ba uwei u nongïakhih pyrshah sorkar na Iran, uba la don 30 snem ka rta, u la shah thombor ha Germany ha saw ngut ki rangbah kiba la ngeit skhem ba ki dei ki nongkyrshan ba ratbah jong ka Islamic Republic ha Iran. Katei ka jingshah batbor jong utei u briew ka la jia ha ka miet Sngi Saitjaiñ ha kawei ka jaka shna kyiad kaba la shah iehnoh ha ka nongbah Iserlohn ha North Rhine-Westphalia.
La suba ba kitei kiba don kti baroh ki dei kiba la don ha ki rta naduh 24 snem haduh 46 snem ka rta. La ioh bat noh ia ki tang hadien jong katei hi ka jingjia da ki bor ka aiñ jong katei ka thaiñ.
Uwei na ki suba donkti u la mynsaw katba u dang pyrshang ban phet na ka kti ki pulit ban lait na ka jingshah kem. Katkum ki lad pathai khubor jong ka thaiñ, ki nongsakhi ki la pyntip sha ki bor synshar hadien ba ki la ïohsngew ïa ka jinglynñiar jong utei u briew ha kaba ki la leit rung sha ka iing ba u sah bad lap ia u hapdeng ki jingmynsaw hadien ba kitei 4 ngut ki la dep ban leh ia katei ka kam runar bad ki la teh ia u ha katei ka jaka. Kumta na ka liang ki bor pynïaid ki la pynkit noh ia u mardor sha jaka sumar namar ym i long shuh ban pynslem ia ka jinglong-jingman ha ka met jong u.
Utei u nongshah thombor u dei u phetwir na Iran uba la pawnam namar ka jingpyrshah ia ka jingsynshar jong ka Tehran, bad u la shah thombor da ka jingthmu ban pynjah burom ia ka long-rynieng jong u ha katei ka rukom.
