Shillong, Nailur 10
U Bah PT Sawkmie, MLA barim ka Mawlai u la pynpaw ka jingsngewkhia ba bun ki Sports Club hapoh Mawlai konstitwensi ki la shah ieh noh beiñ, namar kim ju ïoh shuh kino kino ki lad jingïarap na ki nongmihkhmat.
U Bah Sawkmie u la khlei ïa kine ki kyntien haba kren ha ka jingïakynduh kyrpang jong u ïa ka Umphrew Sports Club, hadien ba na ka liang kane ka klob, ka la kyrpad ïa u ban ïarap lem na ka bynta ban pynlong ïa ka lympung ïalehkai phutbol hapoh katei ka shnong.
Kitei ki nong-kitkam jong katei ka klob ki la pynpaw ruh ba naduh bym long MLA shuh u Bah P.T Sawkmie ym ju don shuh ki lympung ïalehkai ha kiba bun ki shnong kiba don hapoh Mawlai Konstitwensi.
Halor kane ka jingbymïoh jingïarap, na ka liang u Bah Sawkmie u la pynpaw ïa ka jingsngewkhia jur namar ka jingshah iehnoh beiñ jong ki sports club, ki seng samla, bad kumjuh ki samla ba donsap, ki ruh kim ïoh shuh kano kano ka jingïarap pisa na ka liang ki nongmihkhmat.
Na ka liang jong u Bah Sawkmie u la kular ba un sa ïarap ïa ka Umphrew SC na ka bynta ban pynlong ïa katei ka lympung bad kumjuh ban ïarap ïa kiwei kiwei de ki klob kiba don hapoh Mawlai Konstitwensi.
