Shillong, Nailur 10
Ka jingbym ïoh jaka ka Sorkar ban pynlang bad tylliat ïa ki nuit bad ki jaboh jabaiñ ka dei kawei na ki jingeh kaba la pynlong ruh ïa ka Sorkar ban pynsngewthuh ïa ki shnong ki thaw halor ka jingdonkam ban don noh ki jaka pynlang ñiut ha man ki la block bad lada lah ha man la ki shnong khamtam ki shnong kiba kham heh.
U Symbud Myntri Rangbah uba peit ïa tnat pynroi sor u Bah Sniawbhalang Dhar u la ong ba ka Sorkar kan sa ïoh jaka ban pynlang ïa ki ñiut bad ha ki jaka pynlang ñiut kiba thymmai kan don ka jingpynkhuid bad tylliat ïa ki ñiut katkum ki kor ki bor ka juk mynta ha kaba ka jingsma ka long kaba duna bad lah ruh ban leh shibun kiei-kiei na kine ki ñiut.
Ka jingdon ki ‘riew shim kabu kiba ju pyrshah ban don ki jaka bret ñiut ka dei kaba ka Sorkar ka ïakynduh jingeh bha ban ïoh ïa ki jaka pynlang ñiut wat haba ka Sorkar ka la pynshai ba ka rukom pynkhuid bad tylliat ïa ki ñiut ha kane ka juk ka long katkum ki kor ki bor ka juk stad mynta.
Kumba ka long mynta ka jaka pynlang ñiut ha Mawlai ka dei kaba la rim bad kam da lah shuh ban pynkhuid bad tylliat ïa ki ñiut namar ki la jyllei palat. Lada ka poi ka por ba ki nong Mawlai kim shah shuh ban leit bret ñiut ha Marten, lehse kito kiba pyrshah ban buh jaka pynlang ñiut kin ïarap wad jaka lem na ka bynta ka Sorkar.
U Bah Sniawbhalang u la ong ba ka Sorkar Jylla ka la pynkhreh ba ki jaka pynlang ñiut kiba thymmai kin don ka por kumba 50 snem ban treikam bad lyngba ka jingdon ki kor ki bor ym don jingeh ban pynkhuid bad tylliat ïa ki ñiut kiba la pynlang kumba long lem kiwei pat ki jaka pynlang ñiut kiba don ha kiwei pat ki Jylla bad ha kiwei ki ri ruh kumjuh.
Kumta u la ong ba ka Sorkar kam duh jingkyrmen ban ïoh ïa ki jaka ban pynlang ñiut bad u ngeit ba ki paidbah ruh ki sngewthuh ïa ka jingdonkam ban don ki jaka pynlang ñiut ha kylleng ki jaka.
“Ka jinglehkhuid ka dei kaba don lypa ha ki briew bad ngi ngeit ba kin sngewthuh bad ai ka jingïatreilang ba ngi donkam ban lehkhuid bad sumar ïa ka mariang ym ban shu bret pathar ïa ki ñiut bad ki jaboh, hynrei ban lum bad bret ha ki jaka pynlang ñiut khnang ban lah ban pynkhuid bad tylliat,” u la ong.
Haba kylli la ka Sorkar kan thaw lad ruh ban don noh ki jaka pynlang ñiut ha kylleng ki Block ne ha man la ki shnong, u Bah Sniawbhalang u la ong ba ka Sorkar ka la don ïa kane ka jingthmu bad lada lah ha une u bnai yn lum ïa ka jingïalang bad ki bor district ha ryngkat ki Block Development Officer na ki Block bapher bapher ban ïakren ïa kane ka bynta kaba donkam bha.
U la ong ba lyngba ki bor district bad ki Block kin ïakren bad ki bor shnong halor la jingdonkam ban don ki jaka pynlang ñiut bad ban pynkhuid bad tylliat ïa ki ñiut ha man la ki shnong khamtam ki shnong kiba kham heh.
U Bah Sniawbhalang u la ong ba ka jaka pynlait ñiut ha Mawlai ka dei kaba la rim bad ka long kaba donkam ban ïoh jaka pynlang ñiut shawei pat ha ryngkat ka jingpyntrei ïa ki kor ki bor.
