Shillong, Nailur 11
Ka Sports Authority of India (SAI) Training Centre, Shillong kan pynlong ïa ka prokram jied khynnah ïalehkai lyngba ka Khelo India Rising Talent Hunt (KIRTI-MyBharat) Program ha kaba ki khynnah ïalehkai ba don sap ba kyrpang kin ïoh rung ha ki shlem ai jinghikai kiba dong ha kylleng jong ka ri.
Kane ka prokram kan long na ka bynta ka jingïalehkai Athletics bad Football ha kaba yn pynlong ha Government Boys Higher Secondary School kaba ha Jowai, West Jaiñtia Hills District ha ka 16 bad 17 tarik mynta u bnai.
Kat kum ka kyrwoh ba la pyllait da u T. S. Chavhan, Deputy Director ka SAI, STC Shillong, la ong ba ka jingpynrung kyrteng kan sdang naduh ka por 9.30 mynstep haduh 1 baje mynsngi, katba ka jingbishar bniah kan long ha ka por 6 baje janmiet. Kane ka prokram kan shong ha ka jinglah ban ïalehkai ha ryngkat ka jingbishar bniah lyngba ki kor ki bor ka juk mynta.
