Mawkyrwat, Nailur 11
Hadien ka jingdawa jong ka KSU ban kyntiew kyrdan noh ïa ka Mawsynram C&RD Block sha ka Civil Sub-Division, ha ka 11 tarik mynta u bnai, ka Synjuk ki khlieh Nongsynshar Shnong Mawsynram Block ki la mih shakhmat ban dawa na ka Sorkar ba ka dei ban kyntiew kyrdan noh ïa ka Mawsynram Block sha ka Civil Sub Division.
Ha kane ka sngi, ka Synjuk ki khlieh Nongsynshar Shnong ka la lum ïa ka jingïalang jong baroh ki Nongsynshar Hima, ki Nongsynshar Raid, ki Nongsynshar Shnong bad ki ‘riew rangbah jong ka Mawsynram Block ban buddien biang ïa ki kam kiba sahteng kaba ki paidbah ka dong ka thaiñ ki la ju pynsngew sha ka sorkar ha kaba ïadei bad ka roi ka par bad kiwei kiwei.
U Chairman ka Synjuk Ki khlieh Nongsynshar Shnong Mawsynram Block u Bah Hiambor Rapsang haba kren sha ki lad pathai khubor u la ïathuh ba ka daw kaba pynlong ïa ka synjuk ban lum ïa ka jingïalang ka long ban pynkhlaiñ biang ïa ki jingtreikam ka synjuk bad ban buddien biang ïa ki jingdawa kaba ki paidbah ki la ud la nam sha ka sorkar da ki phew tylli ki snem kata ka long ban kyntiew kyrdan noh ïa ka Mawsynram Block sha ka Civil Sub Division.
U Bah Hiambor u la ong ruh ba ka long kaei-kaei kaba sngewsih ba ka Sorkar na kawei ka por sha kawei ka por, na kawei ka snem sha kawei ka snem ka shu kular kai ïa u paidbah bad haduh mynta kita ki jingkular ki khlem poi shaei-shaei bad ki paidbah mynta ki la sngewthuh ba ki la shah ieh beiñ ha kane ka sorkar.
Kumta namar ka jingsngewkhia kum ki nongïalam shnong ki la lum lang bad ki la thaw ïa kane ka kynhun ba la khot ka Synjuk ki Khlieh Nongsynshar Shnong Mawsynram Block kaba ki rangbah shnong na ki dong bapher-bapher ki la pynpaw ïa kita ki jingeh bad ki jingdonkam ban pynurlong noh ïa ka jingdawa pynkiew kyrdan Civil Sub-Division. Nalor kane ki la rai ruh ba kin mih madan noh ban pynsngew sha ka sorkar namar ba ka por ka la dei eh ba kin pynurlong ïa ka jingangnud.
U la ong ruh ba mynta ka kynti, ka sorkar ka dei ban sngap ïa ka sur jong u paidbah bad ban ai Civil Sub Division noh ïa ka Mawsynram bad lada ka sorkar ka dang leh mutlop halor kane ka jingdawa, kan poi ka por ba na ka liang jong ki Dorbar Shnong lyngba ki Khlieh Nongsynshar kin ym ïashimbynta shuh ha kino-kino ki prokram jong ka sorkar.
“Ngam khmih lynti ba kum kata kan jia, namar kan buh jingeh shibun lada ki khlieh nongsynshar shnong ryngkat ki Dorbar Shnong kin ïapynibor haduh katta bad ka sorkar bad nga ngeit skhem ba kane ka sorkar MDA kan sngap lem ïa kane ka jingdawa jong ngi,” la ong u Bah Hiambor.
Ka Synjuk ka ai khublei ruh ïa ki seng bapher bapher, ïa ka KSU bad kiwei-kiwei kumjuh ruh ïa ki nongmihkhmat ba mynta bad kiba mynshwa kiba la ju pynsngew sha ka sorkar halor kine ki jingeh jong u paidbah.
Ka Synjuk ki Khlieh Nongsynshar Shnong Mawsynram Block ha kane ka sngi ka la ïoh ruh ban jied ïa ki nongkitkam bathymmai ha kaba la jied ïa u Bah Hiambor Rapsang kum u Chairman bad u Bah James Kharbani kum u Vice President.
