Shillong, Nailur:
Ki khynnah pule doktor kiba pule ha ka kyrdan Postgraduate (PG) hapoh ka North Eastern Institute of Ayurveda & Homeopathy (NEIAH) Medical College Mawdiangdiang, Shillong hadien ba ki la mad ïa ki jingeh ha kaba ïadei bad ka jingsahteng jong ka ‘stipend’ kaba la 10 bnai kynthih kaba la pynlong ruh ïa kiba bun ki khynnah pule ba kin shem shitom shi katdei eh ha ka ban pynbit pynbiang ïa ki jingdonkam kiba man la ka sngi. Kumta ha ka 10 tarik Nailur 2024 ki la pynlong da ka jingïakhih ha phyllaw jong ka jaka pule da kaba shong kyllaiñ myngor ha ryngkat ki jingthoh ha ki placard na ka bynta ban dawa ban pynurlong ïa ka bhah bad ka bainong kaba ki dei ban ïoh lyngba ka ‘stipend’.
Ha ki placard ba la rah ha katei ka jingïakhih da ki samla pule la thoh, “Our Rights, Our Fights” lane “Ka hok jong ngi, ka jingïaleh jong ngi” bad “No More Delays, Our Future Can’t Wait” lane “Wat Nym Pynslem shuh, ka Lawei Jong Ngi Kam Ap” nalor kiwei-kiwei ki jingthoh.
Na ka liang kine ki khynnah PG, ki la rai ruh ba lada ki bor ba dei peit jong ka NEIAH kim lah ban siew ïa ka ‘stipend’ jong ki khynnah pule, ki la rai ban ïai bteng ïa ka jingïakhih bad ym leit sha ki kam ki jam.
Shuh shuh la ong ruh ba wat hapdeng ki jingud-jingnam bad ki jingpynsngew na ki khynnah pule sha ki bor ba dei peit hynrei na ka liang ki nongpynïaid jong ka NEIAH ki khlem leh eiei ban shimkhia halor kane ka bynta bad ka jingpynslem ban pynïoh ïa ka ‘stipend’ ka la nang jlan.
