Jowai, Nailur 11
Ka ïingbishar High Court jong ka Meghalaya ka la hukum ïa ki briew kiba ïakhih bad khang lynti sha ka kshaid Krangshuri ba ki dei ban mih noh mardor na katei ka jaka bad ban ym khang lynti shuh ïa ki nongleit kai sha katei ka kshaid bad lada kim kongnuh kin ngat ha ka jingpynshitom jong ka ïingbishar.
Kane ka hukum ka la mih na ka High Court jong ka Meghalaya ha ka jingbishar ïa ka mukotduma WP (C) 286 jong u snem 2024, kaba la ujor da ka Raij Buam pyrshah ïa ka jylla Meghalaya bad kiwei pat.
Ha kane ka jingbishar, la pyntip ba la pynlong ïa ka jingïalang kaba lam-khmat da u Deputy Com -missioner, West Jaiñtia Hills District ha ka Sngi Nyngkong jong ka taï0ew ba la dep ban ïakren halor ka jingthmu ban pynïaid ïa ka kshaid Krangshuri kaba hap hapoh ka Amlarem Sub Division da ka District Tourism Promotion Society (DTPS) bad ha kaba la pynmih ruh ïa ka SOP ban buh shipor, haduh ban da pynbeit ïa ka jingïakajia ka rukom pynïaid kam jong ki saw kur kiba hap hapoh ka ‘Raij Buam’ ba kynthup ïa ka kur Buam, Khyriem, Surong bad Sumer, kiba ju peit ïa kane ka jaka.
Katkum ka SOP ban pynïaid ïa ki jaka jngohkai pyrthei ha Krangshuri, ïa ka jingpeit bad jingpynïaid baroh kawei yn leh da ka District Tourism Promotion Society (DTPS) ha kaba ka Nodal Officer kan long ka District Tourism Officer.
La bthah ban pynïeng ïa ki signboard ki ban ai jingtip haba ïadei bad ka bai rung bad kiwei kiba ïadei bad ka Krangshuri kumjuh ruh buh ïa u number phone jong u OC ka Amlarem PS khnang ba ki nongleit jngohkai pyrthei kin ïoh ban ujor mar-mar lada don kano-kano ka jingshah pynthuh ha ka leit ka rung sha Krangshuri.
La bthah ban plie ïa ka bank account kaba thymmai ban pynïaid da ka District Tourism Promotion Society (DTPS) na ka bynta ban kynshew ïa ka kamai kajih kaba mih na Krangshuri bad yn pynshlur ba ki nongleit jngohkai kin siew beit lyngba ka online payment lyngba ka UPI kaba pynïasoh bad katei ka bank account.
