Bertina Lyngdoh
Haba ngi don ïa ka Jingnang Jingstad kaba mut ba ngi don ïa ka Kyrdan Pule. Haba ngi thmu bad angnud ban ïoh ïa kyrdan pule, ngi kwah ruh ban ïoh bat ïa ka kyrdan ha ka kam ka jam. Ban poi sha kane ka thong donkam ban minot tyngeh bha. Uba duk u kham shem jynjar ban poi sha kane ka kyrdan namar ba um kot bor ha ka ïoh ka kot. Ka kyrdan pule ka wanrah ïa ka burom ka nam ha ka longrynïeng u briew. Kata dang heh ha ka kyrdan pule, kata ruh dang ïoh pdiang ïa ka burom ka nam. Haba ngi lah kup ïalade shi rynïeng da ka jingnang jinstad ba pura khamtam eh ha ki kyrdan pule kiba kham shalor, ka ïarap ia ka jabieng ban nym mynthi. Kumta, shim ïa ka lad ban pynjlan ïa ka pule ka puthi ban kham pynsuk ha ka rukkom treikam ha baroh ki liang.
Naduh u A u B, bad kumta ter-ter jingstad jong ngi arted ka nang kiew. Ym tang ba ngi tip ban pule bad thoh, hynrei ban kham shemphang bad ban long u stad pyrkhat. LA biang ha ki dkhot met ngi duna ban kynjoh ïa ka kyrdan pule long kaba kongsan bha. Ka jingpule kam dei tang ïa uba don ka spah hynrei ïa u bym don ruh. Sngewbynñiaw pat ban ong ba kum ki briew bym bianng, ngi dang ibeiñ ipoh ïa kito ki bym don ka kyrdan pule lane kiba rit ha ka kyrdan pule. Ka kyrdan pule ha ka jingshisha, kam lah ne kam dei ban pynïapher kata haba ïa dei bad ka burom briew. U briew u dei hi u briew kumba la saiñdur hi u briew da U Blei ha ka jingshisha ka juk mynta, ka dei ka juk kaba lah shai bha, hynrei katba hangne hangtai pat, dang don kiba pynïapher ïa ka burom briew tang namar ka kyrdan pule.Uba sngewthuh hi ïa ka ioh ka duh ki para mynsiem briew, kim ju burom ia ki briew tang na ka kyrdan pule. Baroh u don ïa ka hok ban bylla, ban im katkum ba la bynta ïa u.
Ban shu kdew hangne, lada duna ha ki dkhot met ruh, u lah pat ban biang ha kiwei ki rukom treikam jong u. Kumjuh ruh haba biang ha ki dkhot met, hynrei lada duna ha ki jingtrei kam lane ym long kaba janai ka rukom trei, kumno pat ngin sngew wat lada ngi lah wan sha khmat bha ha ka kyrdan pule. Te namar kata, baroh ngim long kiba biang, ngi don la ki jong ki jingduna bad la ki jong ki jinglah.
Kumta, kane ka long ka jingkyntu ba burom ïa ka mynsiem ïa ka jingim briew ym ban peit than ïa ka kyrdan pule. Peit bad khmih ïa ka jingdonkam jong ki ym ban shu tharai ne sngewthuh bakla ïa ka jingduna jong ki.
Pyrshang ban nym kiar hynrei shai da kaba burom lem ha ka ktien ka thylliej. Kum ki briew kiba shemphang bad kiba don ka mynsiem ïa tip lem, burom ïaki bad ïa ka longrynïeng jong ki la ki long kumno kumno ruh. Ka mynsiem ïa tip lem kan wanrah ïa ka imlang sahlang kaba khuid ba suba dab ba ka rat dyng-khong ïa ka jingduk. Wat ai ba tang uba don ïa ka kyrdan pule un ioh ïa ka burom khamtam eh haba ïadei bad ka kamai ka kajih hynrei wat uba duna ha ka kyrdan pule ruh un ioh ïa ka juh ka burom na ka imlang sahlang wat la kamai kan rit.
