Divinia Mercy Tynsong
Haba ngi wad dien ïa ka history lane ïa ka tynrai jong u Khasi u Khara, ngi shem ba ka long kaba kyrpang haduh katta katta. Ki Khasi ki Khara ki long ki briew kiba shisur shidur kiba bat ïa ka riti ka dustur, ka niam ka rukom, kiba ri kyndong ïa la ki jingai sngewbha ka mei mariang ba ka long kaba i shongkun i shongkhia naduh kulong kumah. Nalor kata, ki long ruh ki jaidbynriew kiba don burom don akor. Ki da thew thik pa thik ïa ka rukom ïaid rukom ïeng, ïa ka riam ka beit bad ïa ka rukom kren rukom khana.
Haba ngi ïa nujor bad kiwei pat ki ri, ngi shem ba ka ri Khasi jong ngi ka long kaba riewspah shibun ha ka liang ki jingthung ki jingtep, ki dieng ki siej, ki syntiew ki skud, ki sim ki doh, ki mrad ki mreng bad kumta ter- ter. Ka rukom im, ki kam ki jam bad ka trei ka ktah jong u Khasi Khara ka ïai teh song bad ki khlaw ki btap, ki lum ki wah wat haduh kane ka por ka samoi kaba mynta.
Haba ngi ïa puson bad pynleit jingmut shaphang uwei na ki jingthung ba kyrpang tam jong ka ri Khasi- bad uta u long u Khasi Pine lane ‘Pinus Kesiya,’ ha ka ktien nongwei; ngi shem ba ngi lah ban ïoh shibun bah ki jingmyntoi bad jingnang jingtip shaphang une u jait jingthung ba kyrpang eh.
Ka jingkordor jong une u jait jingthung ka long kaba jynsur haduh katta katta. Ka tynrai jong u ka don ha Ri- Khasi kaba hap ha ka jylla Meghalaya. Ka par ruh wat sha kylleng ki thaiñ Asia.
U Khasi Pine u long uta u jait jingthung uba jrong, bad lah ban kha bad pynroi symbai na lade hi. U dei u dieng kseh uba neh beit ka jingjyrjam ha baroh ki aiom (la ka long ha ka aiom lyiur, ne synrai, ne pyrem, ne tlang), um ju kylla rong ne ïap. Lah ban lap ïa kum une u jait dieng ha ki jaka kiba kiba syaid bha ha ka por lyiur bad duna jingkhriat ha ka por tlang lane Subtropical or mildly temperate areas. U long u jait jingthung uba lah ban kot haduh 30-35 m ha ka jingjrong bad u lympen jong u, u long uba beit bha ha ka dur jong ka cylinder. Ka snep dieng ka long kaba rben, ha ka rong ktieh. Ka jingpait ka snieh jong kine ki snep dieng kum ki laiñ kiba jrong ka paw shynna. Ki lamuh (branches) jong u Khasi Pine ki kylla rong saw khleh lang bad ka rong ktieh malu mala naduh u snem uba ar naduh ba ki sdang ban mih lane khie im bad ki long ruh ki lamuh kiba khlaiñ bha. Iwei pa iwei i lamuh i noh jrup-jrup nalor shapoh. Nalor kata, ki sla jong une u jait dieng ki long kiba nep kum u thyrnia bad kiba jem met pat. Kine ki sla ki ‘lam rong jyrngam bha bad ka jingjrong jong ki ka long kumba 15-20 cm ei ei. Lai tylli ki sla ki ju mih kynthup lang bad iwei pa iwei i thyrnia i jrong kumba 1-2 cm bad i long ruh i ba jwat haduh katta katta. Iwei i jingthung I shna khun lane Pollination hapdeng jong ka aiom pyrem (haba khie im lut ki jingthung ki jingri, ki syntiew ki skud bad ki dieng ki siej) bad kine ki
khun pat kin sa kylla long khoh pyllup (coniferous) pura hadien 10- 20 bnai ei ei. Ki Khasi Pine (Pinus Kesiya) ki mih bha ha ki bynta jong ki khlaw ki btap ha kiba mih tang para ma ki hi. Ki lah ruh ban mih lang ha ka jaka ba mih ki jait dieng kiba kha ïa ki jait sla kiba kham ïar tangba kim ju mih pat ha baroh ki bynta jong ki khlaw ki btap (open pine forest). Ha ka Ri Khasi jong ngi, kine ki jait dieng ki long kiba kynrei bha. Ym tang ba ki mih ban pynïap ‘mat, hynrei ngi lah ban sakhi ba ki wanrah ïa bun bah ki jingmyntoi ïa u bynriew. Na une ki jait jingthung ngi lah ban ïoh ïa ki dieng met kiba bha ha kaba ki briew ki lah ban pyndonkam ha ka liang ka shet ka tiew bad kaba kham kongsan eh ka long ba lyngba kine ki jait dieng ki nongshong shong nongshong thaw ki lah ban shna jingshna ruh (nuksa: ki synduk dieng, ki lyng-knot, ki kali dieng ban kit um lane kit jingkit bad kumta ter ter). Kine ki dieng, ynda lah oh shrong bha, ki ai jingkyrshan ruh wat ïa ki jingthung ki jingri kiba donkam jingkyrshan khnang ba kin im bad plung shajrong; ba u slap, ka lyer bad ka jingkhia jong ki soh lane ki syntiew ba mih, kan nym ktah lane julor ïa kine ki jait jingthung kiba donkam jingkyrshan. Ha kaba khatduh eh, lyngba kine ki thyrnia kiba mih na une u dieng, lah ruh ban shna jaka thiah ïa ki mrad ki mreng kiba ki briew ki ri (masi, blang, bad kumta ter ter) bad pynheh pyn san khnang ban ïoh jingmyntoi (kum ka doh, ne ka dud lane kiwei kiwei pat ki jingmyntoi).
Kumta, ngi dei ban kyrsoi bad shim khia ha ka liang ban pyn heh pynsan bad pynroi ïa une u jait dieng uba kyrpang eh khnang ba ka ka jingthmu jong u mynbarim shaphang ka lawei kaba phyrnai jong u jait- bynriew, ban pahuh pahai ha ka liang ki jingthung jingri kan urlong. Ha kaba ngan pynkut noh, nga kwah ban kyntu ïaphi ki khun ka mei- ramew ban shimkhia ha ka liang ban sumar ïa une u jait dieng bad kynthup lang ïa baroh ki jait jingthung khnang ba ka pyrthei ruh kan nym threw mardor lyngba ka jingbthat jong ngi ïa ka jingim jong ki dieng- ki- siej, ki syntiew- ki- skud bad ki khlaw ki btap.
