Gaza, Nailur:
Ka tnad iada jong ka Gaza, ha ka Sngi Ba-ar ka la iathuh ba ka jing-leit hiar thma jong ka Israel sha ka phang Shatei jong ka nongbah Gaza, ka la shim ia ka jingim jong 40 ngut ki ‘riew paidbah bad kumba 60 ngut kiwei pat ki la mynsaw.
Kane ka jingleit hiar thma jong ka Israel ha kane ka sien, ka la ktah ïa ka Al-Mawasi ha ka nongbah ba kongsan jong ka Gaza ka Khan Yunis, kaba la pynbna kum ka jaka ba shngaiñ ia ki ‘riew paidbah kumba la pynbna da ki shipai ka Israel hi naduh kaba sdang jong ka thma. Ha kane ka jaka ki don da ki phew hajar ngut ki nong Palestine kiba la shah pynkynriah bad poi phet sakma ki shong ban rieh tngen.
Hynrei na ka liang ki shipai jong ka Israel hateng-hateng ki ju pynlong ïa ki jingkhynra hapoh bad sawdong jong katei ka thaiñ, kynthup ïa ka jinghiar thma ha u bnai Naitung kaba ki la ong ba ka la shim ia ka jingim jong u heh shipai ka Hamas, u Mohammed Deif, bad kaba ki bor pynïaid ka koit ka khiah jong ka Gaza, ki la ong ba ka Israel ka la pynïap dusmon ïa palat 90 ngut ki briew.
U heh jong ka tnad ïada ri la Gaza, u Mohammed Al-Mughair, haba iakren bad ki nongthoh khubor u la ïathuh ba ki la don kumba 40 ngut ki kiba khlad bad kumba 60 ngut ruh kiba la mynsaw, ha kaba ki bor pynïaid ka Gaza ki la hap ban pynkit mardor ia ki sha ki hospital ba marjan hadien ka jingiasiat kaba la neh shi miet.
U Mughair u la iathuh ba ki bor pynïaid bad ki tnat iarap jong ka Hamas, ki dang ialeh ban ban wad bad pyllait ia ki 15 ngut kiba la jah rngai na katei ka jingleit thombor dusmon jong ka Israel ha ka sngi ba la leit.
Kumjuh ruh na ka liang ka tnat shipai Israel, ka la pyntip ba ki shipai ka Israel ki la ioh ban leit thombor sha ka bynta ba don ki dkhot jong ka Hamas kiba don ha ka thaiñ ba don katei hi ka jaka sam jingïarap sha ki paidbah hapoh Khan Yunis.
Namar naduh ba sdang hi jong ka thma haduh mynta- mynne, ka Israel ka la ju kynnoh bad ong ba ki lehnoh Hamas ki shim kabu ia ki paidbah jong ka Gaza da kaba leit rieh ialade ha ki jaka ba don ki riew paidbah khnang ba ka Israel kan ym nud ban leit hiar thma ne thombor, hynrei ka Israel kam banse ban leh ia kaba donkam naka bynta ka hok ki paidbah nong Israel kiba shah pynshitom beiñ ha ka Hamas bad kumjuh ruh ban poi sha ka thong ba ka Israel ka la buh bad thmu naduh kaba sdang ban ioh synshar hi noh syndon ia ka nongbah Gaza, kaba la synshar da ki lehnoh Hamas mynta da ki phew snem.
