Shillong, Nailur 11
U MDC ka BJP na Tura konstitwensi u Bernard N Marak u la kynnoh ba ka National People’s Party (NPP) kan sa pynjot ïa ka Garo Hills Autonomous District Council (GHADC) namar da ka pisa kaba la mang ïa ka GHADC ban leh ïa ki kam pynroi la bei ïa ka NPP.
U Marak u la ong ba ka NPP kaba dei paralok kaba ïatreilang bad ka BJP ka pyndonkam bakla ïa ka pisa kaba mang ïa ka GHADC kaba pynlong ba kan kit ram.
Une u MDC ka BJP na Tura u la ong ba ka pisa kaba la mang na ka bynta ban leh ki kam pynroi ha Rilum Garo lyngba ka soskular kaba la soi bad ki kynhun ANVC mynshwa, la shu pyndonkam bakla bad kane ka la pynlong ïa ka GHADC ba kan pyndonkam ïa ka pisa T.50 klur ban siew tulop wat lada kane ka pisa ka dei kaba la mang da ka Sorkar Pdeng ban leh ïa ki kam pynroi. U Marak u la ong ba kane ka jingleh ka la pynkheiñ ïa ki kyndon jong ka NITI AYOG.U Marak u la pynkynmaw ba ïa ka soskular (Agreed Text for Settlement) kaba la ïasoi da ka ANVC bad ANVC (B) la pynlong ha Delhi ha u snem 2014. Kane ka jingthmu jong kane soskular ka long ban pynkhlaiñ ïa ka GHADC, hynrei ha kine ki 10 snem ba ïalam da ka Sorkar NPP, la iehbeiñ ïa ka soskular da kaba kam burom ïa ki projek bad kiar ban don ka jingïakynduh bad ki kynhun ANVC.
“Ïa ka pisa la pyndonkam bakla bad bun ki projek la shu kam burom bad kiba bun pat la shu ieh khlem pyndep,” la kynnoh u Marak.
U Marak u la pynkynmaw ruh ba hadien ka jingsoi soskular ha u snem 2014 da ki kynhun ANVC, ka GHADC ka la ïohpdiang ïa ka song kyrpang (special package) kumba T. 100.71 klur ha u snem 2015-16 na ka bynta ki kam pynroi ha baroh ki liang ha Rilum Garo.
“Hadien kane, la nang ïohpdiang shuh ïa ka pisa da ka GHADC haduh mynta kaba dei ban pyntreikam da ki Rural Local Bodies (RLB) bad Urban Local Bodies (ULB) ha GHADC. Pynban ka NPP kaba ïalam ïa ka Executive Committee ka la pyndonkam bakla shibun ka pisa, na ka bynta ban pyndonkam ban pynïar ïa ka NPP ha Manipur, Arunachal bad kiwei ki Jylla,” la kynnoh u Marak.
U la ong ruh ba ka Executive Committee kam shym la lah ban phah ki kaiphod ba la dep ïa ki kam bad haduh mynta, ym pat lah ban phah ïa ki Utilisation Certificate sha ka Sorkar Pdeng.
Na ka T.100.71 klur, u Marak u la kynnoh ba kham bun ki projek la buh lypa na ka bynta kiba ïajan bad u CM, kiba khlem lah satia ban pyndep wat hadien 8 snem.
U Marak u la ong ruh ba ka museum project jong ka GHADC kaba la bhah ban pyntrei u Finance Secretary ka NPP ka la shu jah kumto bad ka don ruh ka jingleh thok ïa ki projek kiba wan na ka Sorkar Pdeng ha kaba 40% ki projek ka Sorkar Pdeng ki jah na Council. “Ka Council mynta ka mad ïa ka jinghiran pisa ka dei namar jong ka NPP kaba don jingthmu ban pynjot ïa ka GHADC,” la kynnoh u Marak.
