Shillong, Nailur 11
U MP ka Voice of the People Party (VPP) na Shillong Parliamentary konstitwensi, Dr. Ricky A.J. Syngkon ha ka Sngi Balang u la ong ba un sa leh la ka jong ka bynta ban buddien halor ka jingpynrung ïa ka Ktien Khasi ha ka Khyrnit ba 8 ka Riti Synshar ka Ri.
“Ïa kata te ngam lah ban ong…ïa ka lashai, ka la shi sngi ka kham shitom, tangba ngi kyrmen skhem. Kum uta u shakri uba ki paidbah ki la jied te ngan sa leh la ki jong ki bynta kat kiba dei ban leh da ka rukom bad da ka lynti kaba dei,” ong u Dr. Syngkon haba jubab la ka jingpynrung ïa ka Ktien Khasi ha ka Khyrnit ba 8 kan dang shim por ne em naba ka dei ka mat jingdawa kaba la slem bah.
Haba kdew ba haba leit hapoh ïingdorbar Parliament, ka dei ka kamram bad ka hok jong u nongmihkhmat ban ïoh kren, u MP u la ong ba dei halor kane ka nongrim ba u la dawa na u Lamphang ka Lok Sabha halor katei ka bynta namar ka dei ka hok jong u paidbah. “Nga, nga long u nongmihkhmat jong kane ka konstitwensi kaba don da ki lak ngut ki paidbah – kumba ka long, ka ri India ka donkam ban ïohsngew ruh ïa ki mat ki jura jong ka konstitwensi kaba nga mihkhmat,” u la ong.
Ha kajuh ka por, u la ong ba kino-kino ki ktien kiba rung ha ka Khyrnit kaba 8, kata hapoh ïingdorbar Parliament ruh ki lah ban kren da ka ktien lajong da kaba ai nuksa ba ki nong Assam ki kren da ka Assamese, kumjuh ki Bengali, ki Odia, Tamil ki kren da ka ktien lajong.
“Dei na kata ka daw nga angnud ba ka ri India kan ïohsngew ïa ka ktien jong ngi lyngba ki MP na kane ka dong ka thaiñ jong ngi ban kren da ka ktien Khasi ha Parliament,” u la ong. Haba kylli, u Dr. Syngkon u la bynrap ba kaba nyngkong eh kaba u la leh ka long ban kren bad pynsngew halor ka jingdonkam ïa kaba ka Sorkar India kan pdiang ban pynrung noh ïa ka Ktien Khasi hapoh ka Khyrnit kaba 8. “Ki dang don sa kiwei-kiwei kiba dang sah kiba ngi dang hap ban buddien,” u la ong.
Kum ban shu kdew hangne, ka ïingdorbar thawaiñ ka Jylla ha u snem 2018 da kawei ka sur ka la mynjur ïa ka rai ban kyntu ïa ka Sorkar Pdeng ban pynrung noh ïa ka Ktien Khasi bad Garo ha ka Khyrnit ba 8 ka Riti Synshar ka Ri, hynrei kumba ka long, kane ka kam ka dang sahteng haduh mynta. Na ka liang ka Khasi Authors’ Society (KAS), ka kynhun ba hakhmat kaba don bynta haba ïadei bad katei ka jingdawa, ha u snem ba la dep ka la pynlong ïa ka National Seminar ha New Delhi bad ka jingïakhih bad jai-jai ha ryngkat ka jingdonlang ki kynhun seng bapher-bapher ha Jantar Mantar ban pynsngew sha ka Sorkar India halor katei ka jingdawa.
