Shillong, Nailur 11
Ka Big Futsal Fest jong ka Big FM ka la sdang ha ka Sngi Ba-ar da kaba sakhi ïa ka jinglah ban thep kol bun ha ki katto katne ki jingïalehkai kiba la pynhun ïa ki nongpeitkai.
Ka sngi kaba nyngkong jong ka jingïalehkai Futsal kaba nyngkong eh ha ka nongbah Shillong la ïohi ïa saw tylli ki jingïalehkai ba ïakhun da ki shlem treikam jong ka sorkar jylla lem bad ki shlem treikam shimet jong ka nongbah.
U Bah ShakliarWarjri, Myntri ka tnat ïalehkai jong ka Sorkar Jylla u la plie ïa kane ka jingïakob bad u la ïaroh ruh ïa ki nongpynïaid bad ki kynhun ba ïashim bynta ba ki la long shi bynta ha kane ka tamasa ba nyngkong jong ka futsal.
Ha ka jingkren jong u, u la pynpaw ïa ka jingpyrshang jong ka sorkar Jylla ban kyntiew ïa ki jingïalehkai khamtam ïa ka phutbol lyngba ka prokram ba kongsan jong ka ‘Mission Football’ bad u la kdew ba ki jingthmu kum ka Big Futsal Fest ki ïahap bha bad ka jingpyrshang jong ka Sorkar ban kyntiew ha ka kam ïalehkai phutbol ha ka Jylla.
U Bah A.L Hek, Myntri ka tnat ri mrad jong ka sorkar Jylla u la long kum u symbud kongsan ha kane ka jingïalang bad u la pyllait ruh ïa ka trophy na ka bynta ki nongjop bad pynbna ba la plie ïa kane ka lympung.
Ha ki jingïalehkai kiba la long ha katei ka sngi, ka NEEPCO ka la pynliem ïa ka ITI Shillong da 7-2 kol ha kaba u David Kurkalang u la thep saw kol. Ka kynhun ïalehkai ba la tbit bha ka AG Meghalaya Futsal ka la jop da kaba suk ïa ka Banalari Motors da 4-1 kol, katba ka MeECL ka la pynliem ïa ka SP Office, East Khasi Hills da 7-6 kol ha ka jingïakhun kaba itynnad tam ha kane ka sngi. Ka jingïalehkai kaba khatduh ka PHE Department ka la jop da 7-3 kol ï aka MUDA.
Lah ban kdew ba ki la don haduh 16 tylli ki shlem treikam jong ka sorkar Jylla lem bad ki shlem jong ki riewshimet kiba ïashim bynta ha kane ka lympung ïalehkai kaba la pynlong ha Thrive Sports Arena, Langkyrding ka ban pynkut ha ka 14 tarik mynta u bnai. Ïa kane ka Big Futsal Fest la pynlong da ka Big FM ryngkat ka jingkyrshan na ka tnad ïalehkai jong ka Sorkar Jylla, kumjuh ka Maruti Suzuki Arena, ka Indian Bank bad ka Royal Enfield.
