New Delhi, Nailur:
Ki ri na ka thaiñ West ha ka Sngi Ba-ar ki la pynbna ïa ki jingpynjari kyndon ba thymmai pyrshah ïa ka Iran halor ka jingpynbiang ïa ka Russia da ki ‘namding na ka bynta ban pyndonkam kyrkieh ha ka jingiakhun thma pyrshah ïa ka Ukraine. Kane ka jingai jingkyrshan jong ka Iran ia ka Russia ka la nang pynjur shuh shuh ia ka jingïakynad kaba la buh jingma ia ki ri ka dew-bah Europe baroh kawei.
Ka Britain, France bad Germany, ha kane ka por ki la pynbna ba kin pynkut noh ïa ki jingïateh kular ha ka kam liengsuiñ bad ka Islamic Republic bad kin pynshitom ïa ka kompeni liengsuiñ jong ka, ka Iran Air, naba ki la kynnoh ruh ba ka Iran ka la pynkheiñ bunsien ïa ki jingmaham halor ka jingpyndonkam bakla ïa ki tiar thma da kaba leit ai jingkyrshan ia ki ri kiba kam dei ban leh kumtei.
Ha ka jingleit jngoh jong u Myntri kam bar ri jong ka US, u Antony Blinken sha London, u la maham ba ia kitei ki ‘namding, ka Russia ka lah ban pyndonkam ban leit hiar thma pyrshah ia ka Ukraine tang hapoh katto katne taiew ki ban wan bad ka Iran kan sa iohi ia ka jingma ba ma ka hi, ka la wanrah ia ka Europe baroh kawei namar ka jingleh pynkheiñ aiñ jongka. Namar la ong ruh ba, da ki phew ngut ki shipai jong ka Russia, ki la ioh jingpyntbit na ka Iran ban pyndonkam ia utei u namding ‘Fath-360’, uba lah ban kot ia ka jingjngai kaba 75 Mile lane kumba 120 Kilometre sha ka jaka ba la thmu ban pynher bad pynbthei ia u.
U President ba thymmai jong ka Iran bad u myntri kam bar ri, ki la kren bunsien ba ki kwah ban pynbha biang ia ka jingiadei bad ka Europe namar ka Iran ka la shah pynngat kyndon man ka por haba iadei bad ka jingleit ai jingkyrshan ia ka Russia. Kumta la ong ba ka Iran ka la kwah ban lait noh na kitei ki jingshah pynjari namar kam kwah ban sah marwei kumba long ka Russia.
Ka Washington ka la kynnoh ïa ka Iran Air ba ka la pynioh-nong bad pynkiew ha ka liang ka leit ka wan jong ka Russia.
Hynrei ka Iran ka la kyntait ia katei ka jingkynnoh bad u nong-aiktien jong ka tnat kam bar ri ka Iran, u Nasser Kanani, u la ong ba ki jingkynthoh jong ki ri Sepngi, ki long kiba bakla. Kine baroh ki long tang ki jingpynthut ban pynklet bad lyndet ïa ka jingleit ai jingkyrshan jong ka US ïa ka Israel ha ka thma pyrshah ïa ki lehnoh Hamas.
