Khiehriat, Nailur:
Ka surok bah NH-6, wat la ka dei ka surok kaba kongsan kaba pynïasoh bad kiwei pat ki jylla ha ka thaiñ Shatei Lam-Mihngi, hynrei ka dei pat ka surok kaba la shah ieh shrah khamtam naduh Lumshnong shaduh Ratacherra Malidor, East Jaiñtia Hills District.
Kane ka surok bah ka long ka surok kaba sniew shaba palat u pud bad dap satang da ki thliew ki syar ha shilynter jong ka bad nalor kata ba ki jingkieng ruh ki la tor bad paw lut ki nar.
Namar ka jingsniew jong ka surok, ka pynlong ïa ki kali ban sniew ha man la ki jaka kaba la wanrah pat ïa ka jingsahkut kali ha kiba bun ki jaka kaba shimpor ïa ka ïaid ka ïeng lyngba kane ka surok bah.
Ka KSU Narpuh Circle ha u kyrwoh ka la kynnoh haduh mynta ka sorkar jylla kam shym la leh eiei halor katne ka jingjynjar ka leit ka wan lyngba kane ka surok NH 6 hapoh ka thaiñ Elaka Narpuh.
“Imat ka sorkar ka ai kontrak sha ka Dhar Company bad ka Dhar Company pat ka ai sub kontrak ban pyndap khyndew sha kito ki briew ki bym don tiar eiei ne kot bor ban leh”, la kynnoh ka KSU bad bynrap ba ka jingeh bad jingkthang ka dei ïa u paidbah.
