Shillong, Nailur 11
Ka kynhun rangïalehkai Under -17 jong ka Mynken Christian Higher Secondary School ka la mad ïa ka jingshah rem noh ha ka kynhun jong 10 ngut ki rangïalehkai ka T.G English School kaba na Manipur lyngba ka jingïashut tie-breaker (sudden death) da 4-3 kol ha ka jingïakhun final kaba la long ha ka Sngi Balang ha Dr. Ambedkar Stadium ha ka nongbah Delhi.
Ha kane ka jingïakhun final baroh arliang mamla ki la ïakhun tyngeh naduh kaba sdang bad haduh kaba kut ka jingïalehkai ki la ïakhaid mar 1-1 kol hadien ba ka Mynken CHSS ka la lah ban pynphai lyngba ka penalty.
Ha ka jingshisha ki rangïaleh-kai ka Mynken CHSS ki la lah ban ïalehkai bha naduh kaba sdang ha kane ka lympung bad ban long ka kynhun kaba khlem shah rem, hynrei ka jingbym lah ban pynurlong ïa ki kabu ba ka ïoh ka la pynlong ïa kane ka kynhun ban duh noh ïa ka lad ban kynjoh sha ka thong.
Haduh kaba kut ka jingïalehkai jong ka kylla step ka Manipur ka dang tam da shi kol hadien ba ka la ïoh ban pynkhih jar nyngkong eh lyngba u Mandigong ha ka minit kaba 31 na ka daw ka Meghalaya kam shym la lah ban pynphai wat la ka la ïoh ïa ki kabu kiba biang.
Ka Manipur ka la hap ban ïalehkai sa tang 10 ngut ki rangïalehkai na ka daw ba u Heroba u la shah sei da ka red card ha ka minit kaba 51 hadien ba u la kum ktah da ka kti ïa ka bol hapoh box. Dei hangne ba na ka liang u rephri u la kdew sha ka penalty, hynrei ka Mynken CHSS ka la pynlehnohei ïa kane ka kabu ksiar. Dei ha ka minit kaba 67 ba kane ka kynhun ïalehkai kaba na Bhoirymbong ka la ïoh biang sa kawei pat ka penalty bad dei hangne ba u Banpliebok u la lah ban ïakhaid mar shi kol haduh kaba kut ka jingïalehkai.
Kumta ha ka jingïashut ïa ka tie-breaker ka Mynken CHSS ka la shah rem noh ha ka Manipur da 4-3 kol bad ka la duh noh ïa ka lad ban rah ïa ka nam jop.
Lyngba kane ka nam jop ka Manipur ka la ïohpdiang ïa ka khusnam kaba T. 5 lak, katba ka Myngken CHSS ka la ïoh T.3 lak. Katba ki kynhun kiba la shah rem noh ha ki jingïakhun semi-final ki la ïoh mar T. 75,000 bad kiba shah rem ha ka quarter final ki la ïoh mar T.40,000.
