Shillong, Nailur 11
U Myntri ka tnat Bording, u A.T Mondal u la kubur ba ki briew ka Meghalaya Energy Corporation Limited (MeECL) nalor ba ki hap bun kam ym tang ban pynbiang kham kloi ïa ka ilektrik haba jia ki jingshah lynshop mariang hynrei ki hap ruh ban ot ïa ki dieng ne tnat dieng kiba khyllem ha ki post ilektrik bad waïar ilektrik.
U Mondal u la ong ba ka jingkhyllem ki dieng bad kiwei kiwei ki bor lynshop mariang ki ju jia haba jur ka lyer bad u slap ha kaba ki nongtrei ka MeECL ki hap ban bun kam kumno ban shna bad maramot biang ïa ka bording kaba la duh namar ka jinglynshop ki dieng ki siej.
“Ngin sa ïakren ïa kane ka phang namar ka long kaba donkam ban shim jingkitkhlieh lang kum ka tnat khlaw kaba dei ban peit ïa ki dieng kiba buh jingma bad kiba donkam ban pom ïa ki tnat lane pynkhyllem,” u la ong.
Man ka por haba jur slap bad jur lyer, ki dieng ki ju khyllem bad don ruh ki tnat dieng kiba kdiah ha kaba ki waïar ilektrik ki dkut bad julor noh kaba poi sha u pud ban thut ka jingsam bording ilektrik ha kylleng ka Jylla.
Ka ju mih ruh ka jingkhñium ïa ka Meghalaya Energy Corporation Limited (MeECL) bad ka shah kynthoh haba slem ban maramot bad pynïoh biang ïa ka ilektrik.
Ki briew ka MeECL ki ju bun kam ar shah lai shah haba jia ka jingkhyllem ki dieng kiba ban ïa ki waïar ilektrik, post ilektrik ne transformer namar ki dei ma ki kiba pom ïa ki dieng kiba khyllem ha ka por ba maramot ïa ka jingsam bording ilektrik. Ki briew ka MeECL ki kubur ba ka kam ka khia shisha ïa ki haba khyllem ki dieng namar nalor ba ki trei ban maramot ban pynbha biang ïa ka jingsam bording ilektrik, ki hap bun kam sa ban ot bad weng ïa ki dieng kiba khyllem.
