Washington, Nailur:
U heh barim ka CIA u la shah kem bad shah pynngat kyndon noh ha ka Sngi Balang da kaba rai set patok haduh 10 snem kynthih namar ka jingdon kti ha ki kam syntiat na ka bynta ka China.
U Alexander Yuk Ching Ma, 71 snem ka rta, u la phla hapdeng ka jingtohkit kaba bniah jong ka tnat tohkit ha u Jymmang ba la leit halor ki jing-iadon kti jong u ban phah ia ki jingtip sop-sop na US sha ka tnat syntiat jong ka China.
Utei u heh u la trei bad ka CIA naduh ki snem 1982 haduh 1989, hynrei la ong ba mynta u la hap ban shong patok ei namar katei ka jingiadon kti jong u bad ka kynhun syntiat jong ka China. U la ia dei kam bad katei ka kynhun syntiat na China ha u Lber jong u snem 2001 bad u la phah shibun bah ki jingtip ba kongsan na US sha ka China na ka bynta ka jingsiew kaba $50,000 kaba katei ka tnat syntiat jong ka China ka la siew sha u ban ioh ia ki jingtip donkam na ka US.
Namar la ong ba ka China ka ju kwah ban tuh bad thied buit na ki nong US lane ki dkhot jong ka tnat iada ka US. La ju lap ia kane man ka por ba ki heh ka tnat iada jong ka US ki ju ngop ha ki buit jong ka China da kaba ka siew ruh ia ka jingsiew kaba heh tang ba kin phah ia ki jingtip kiba bniah khnang ka China kan lah ban pynkhreh bad iohi ia ki rukom treikam bad ka jinglong-jingman ha US lyngba kitei ki briew kiba ka ioh ban thied buit.
