Shillong, Nailur:
Kum shibynta ban ai jingkyrshan ïa ka skul bad ruh ban siew tulop ïa ki nonghikai jong ka skul Mawroh Secondary School, ki nongïalam jong ka Shnong Mawroh ha ka 10 tarik Nailur 2024, ki la pyllait paidbah ïa ka tiket khalai nusib ne ka ‘Lucky Draw’ ha ka prokram kaba la pynlong hapoh ka phyllaw jong ka skul.
Haba ïoh ban ïakren ha kane ka sngi, na ka liang u Rangbah Shnong ka shnong Mawlai Mawroh, u Bah HBR Lyngdoh Nongpyiur, u la ïathuh ba kum ka shnong ki la kyrshan borbah ban siew tulop na ka shnong sha ki katto-katne ngut ki nonghikai kiba hikai ha kane ka skul Mawroh Secondary School.
U Rangbah Shnong u la ïathuh ruh ba kum ka shnong ka la ïoh ban sakhi ïa ka jingïashim bynta jong baroh ki longïing kiba don hapoh ka shnong kiba la ïadon bynta lang ban noh synñiang bad kyrshan ïa kane ka skul.
U la ong ruh ba kane ka skul ka dei ka shlem ai jinghikai na ka bynta kito ki khynnah kiba wan na ki longïing-longsem kiba duna ha ka ïoh ka kot bad lyngba ka jingnohsynñiang lang jong kiba bun balang, kin ïoh ruh ïa ka lad ban kyntiew shuh-shuh ïa kane ka skul ha ki por bad ki snem ki ban sa wan.
“Kane ka skul jong ngi kaba la seng naduh mynshwa ha kaba kiba bun hi na ki khynnah skul ki dei kiba wan na ki longïing baduk bad ka bai skul hangne ka dei tang T.50 ha ka shi bnai bad ngi don haduh klas 10. Na ka bynta ki nonghikai kiba hikai ha ka klas 8, 9 bad 10, ngi siew tulop beit na ka shnong ka mut na baroh ki nongshong shnong kiba don hapoh Mawroh, ki ïadon bynta lang ha ka ban siew ïa ka bai tulop jong ki nonghikai”, ïathuh u bah Lyndoh Nongpyiur.
Utei u Rangbah Shnong u la ïathuh ba ki nonghikai kiba la siew tulop da ka shnong ki don kumba 3 ngut eiei ha kaba ha ka shibnai ka bai tulop ka ju poi hapoh ka T.40 hajar.
Na ka liang u Rangbah Shnong u la kyntu bad kyrpad ïa ki paidbah ba kin ïarap ban thied lem ïa kitei ki tiket kaba long tang T.50 khnang ba kan long ka jingkyrkhu kaba khraw ïa katei ka shlem ai jinghikai.
