Shillong, Nailur 12
Ka Confederation of Ri Bhoi People (CoRP) ka la dawa na ka tnat PWD ba ka dei ban maramot noh mardor ïa ka ïing shongthait ne Rest House ha ïew Mawroh kaba hap hapoh Hima Jirang, Ri Bhoi District.
Ha ka kyrwoh ba la phah da u Vice President Bah Gershome Hat u la ong, ka seng ha ka jingleit jurip dang shen ka lap ba kane ka Rest House jong ka tnat PWD ka la kylla kum ka sem blang bad ka la jot lut naduh ki jingkhang ïit, jingkhang bah bad ka tnum jong ka ïing shet ja ka la hap sha madan namar bym don ki nongpeit nongsumar la bun bun snem.
Kane ka pynpaw ïa ka jingkheiñ sting ka tnat PWD haduh ba kane ka ïing sorkar ka kylla ïing jot bad kylla ktem sniew namar ka don ha khappud bad ka jylla Assam. Kumta ka tnat PWD ka dei ban shimkhia ban pynbha noh khnang ba ki briew na jylla Meghalaya kiba leit donkam ha katei ka thaiñ kin ïoh jaka shongthait bad kan long ruh kum u mawpud hapdeng ka Meghalaya bad Assam.
Na ka liang ka seng ka pynpaw lada ka tnat PWD ka pynbha bad pynitynnad ïa katei ka ïing kum ka ‘Rest House ne Inspection Bungalow’ kan ïoh shibun ki jingmyntoi, namar ki don bun ki nongleit nongwan na jylla bad na Assam kiba wan shangkai lyngba ka surok MMR Road hadien ba shna pynheh ïa ka surok naduh Rani Godown haduh Mairang, Eastern West Khasi Hills.
