Shillong, Nailur 12
Ka lympung ïalehkai Third Division Football League 2024 ba la pynïaid da ka Shillong Sports Association ka la nangjam shaphrang ha kaba ka Nongmensong SC bad ka Lumparing SC ki la ïoh jingjop ha ka Sngi Palei ha madan Polo.
Ha kane ka jingïakhun kaba la long ha SSA Stadium Polo, ka Nong-mensong ka la pynliem noh ïa ka Kharang SC da 3-1 kol.
Ha kane ka jingïalehkai wat la ka Kharang ka la ïoh ban pynkhih jar nyngkong eh ha ka minit kaba 32 lyngba u Jaspal Kurbah, hynrei tang hadien shi minit ka Nongmynsong ka la lah ban pynphai kylla lyngba u Midul Amsong na ka bynta ban ïakhaid mar 1-1 kol ha ka kylla step.
Hadien ba la bteng biang ïa ka jingïakhun jong ka kylla miet ka Nongmensong ka la pynbud biang ïa ka kol ba ar lyngba u Pynshai Jyrwa ha ka minit kaba 58. Ha shwa ban wai ka jingïakhun, kane ka kynhun ka la thep biang sa shi kol lyngba u Wilton Lyngdoh ha ka minit kaba 90 na ka bynta ban khur syndon ïa ka jingjop.
Haba phai sha ka jingïalehkai ba ar, ka Ïaityllilang SC ka la shah rem da 2-3 kol ha ka Lumparing SC. Kane ka nam jop ka la wan urlong lyngba ki ar kol ba la thep da u Riskhem Syiem- ha ka minit kaba 40 & 63 lem bad u Sholinstar Syngkli (66). Na ka liang ka Ïatyllilang ka la lah ban pynphai kylla ar kol lyngba u Marbianglang Mawlong (8) bad u Enewell Kurbah (78).
Ka jingïalehkai jong ka Second Division ha ka Sngi Thohdieng ka long hapdeng ka Imson SC pyrshah ïa ka Meghalaya F.T ha ka por 12:30, katba ka Smit SC ïa ka Laitkyrhong SC ha ka por 3:30 janmiet.
