Shillong, Nailur 12
Ki paidbah ‘riew ïeit phutbol ki la pynpaw ba ka tnat ïalehkai jong ka Sorkar Jylla ka la dei ban phah ïa ki coach ba kin ïoh ka jingshah hikai (refreshers course) khnang ba kin lah kumno ban ai jinghikai pat ïa ki khynnah ïalehkai ym tang ha ka sap ban ïalehkai, hynrei wat haduh ka bor jabieng khnang ba ki lah ban teh lakam ha ka rukom ïalehkai.
Kane ka la wan hadien ka jingshah rem noh ka Mynken Christian Higher Secondary School ha ka final jong ka 63rd Subroto Cup International Foot-ball Tournament 2024 lyngba ka tie-breaker ha ka T.G English School kaba na Manipur da 4-3 kol ha ka sSngi Balang ha Dr. Ambedkar Stadium kaba ha ka nongbah Delhi.
Haba ïakren bad u nongthoh khubor, ki katto katne ki paidbah ki la pynpaw ba ki khynnah ïalehkai ka Mynken CHSS kim pat long skhem ha ka rukom ïalehkai bad khamtam eh haba ki shah thep kol ki kulmar jingmut na ka daw ba ki coach kim lah ban pynjai-jai ïa ki khynnah.
Ha katei ka jingïa-khun, la sakhi ba ki khynnah ïalehkai ka Mygken CHSS ki la kulmar jingmut hadien ba ki la shah thep kol bad ruh kim long skhem jingmut haba ki shut ïa ka penalty bad kumjuh ha ka tie-breaker.
Ym lah ban len ba kane ka kynhun la la lah ban ïalehkai bha naduh kaba sdang jong kane ka lympung bad wat haduh ka semi final. Kane ka kynhun ka la lah ruh ban ïalehkai bha ruh ha ka final, hynrei tang na kitei ki daw kiba la pynlong ïa ka ban mad ïa ka jingshah rem.
Ki la ong ba ha kum kitei ki jingjia ka la dei ka kamram jong u coach kumno ban pynjai-jai ïa ki khynnah bad ba kin pynleit jingmut beit ha ka jingïalehkai ym ban kulmar jingmut ïalade.
Ki la pynpaw ba kum ka Sorkar Jylla kaba la pynlut nadong shadong na ka bynta ki skul ki ban mihkhmat ïa ka Jylla sha ka International Subroto Cup, ka dei ban sei da ki coach kiba la ïoh ka jingshah hikai ym ban shu phah da ki bym don ka jingnang jingtip ha kane ka jingïalehkai. “Kum ki coach ki dei ban ïoh ka jingshah hikai (training) kaba paka kumno ban ai jinghikai pat ïa ki khynnah ym tang ban ïalehkai, hynrei wat ha ka bor jabieng jong ki khynnah khnang ba kan ym pynkulmar jingmut ïa ki khynnah haba ka kynhun jong ki ka shah thep kol.”
