Shillong, Nailur:
Kum shibynta ban ai jingïarap ïa u samla Steve Jyrwa ba un poi sha ka thong jong ka jingjop ha ka jingïakob shad ba la tip kum ka India’s Best Dancer Season-4 kaba la pynlong ha ka nongbah Mumbai, ka Eastern Dance Ions (EDI), ka All Meghalaya Dance Association (AMDA), ka Shillong Dance Academy (SDA) bad ka Megha Warriors Dance Academy (MW) kin sa pynlong ïa ka jingïakob shad ne ka ‘Dance Battle’ ha ka 14 tarik u Nailur 2024.
Ïa katei ka jingïakob yn sa pynlong ha Khyndai Lad ka ban sdang naduh ka por 12 baje mynsngi.
Ha kane ka jingïakob, yn don 3 tylli ki jingïakhun kata ka Open Style na ka bynta ki khynnah, ka Popping bad ka Breaking. Kino-kino kiba kwah ban ïashimbynta ha kane ka jingïakob kin hap ban siew T.50 kum ka bai rung bad ki nongjop ha kane ka jingïakob kin ïoh rah ïa ka song pisa ha ryngkat ki jingai sngewbha.
Kum ban shu kdew hangne, u samla Steve Jyrwa u dei ba shong ba sah ha Nongmensong bad u la leit ban ïashim bynta ha katei ka rynsan ïakob shad kaba la sdang ha u Naitung mynta u snem ha kaba u la lah ban pynïap-biej ïa ki nongbishar ha katei ka jingïakob da kaba poi syndon shaduh ka phainal jong ka jingïakob shad India’s Best Dancer Season-4.
