Shillong, Nailur 12
Ka Jyotish Peethadhee-shwar Shankaracharya Avimukteshwarandah (JPSA) kaba dei ka kynhun kaba thmu ban pynlong ïa ka ‘Gau Dhwaj Sthapana Bharat Yatra’, ka la kynnoh ïa ka Shillong Press Club (SPC) ba kam shym la ai jaka na ka bynta ban kren halor kane ka jingthmu jong ki. Kane ka jingkynnoh ka la mih na kine ki briew ki bym shym la poi satia wat ha Shillong kumba ki la pan ban pynlong ha ka por 1 baje mynsngi.
Katkum ka durkhih (video) ba la pyllait da ki briew jong katei ka kynhun ki la ong ba kim shym la lah ban poi sha Shillong ha ka Sngi Palei namar ba don ka jingtwa khyndew ha lynti. Hynrei kaba lyngngoh pat nalor ba ki khlem poi sha Shillong, ki kynnoh kylla pat ïa ka Shillong Press Club ba kam shym la ai jaka ïa ki da kaba kynnoh shuh shuh ba kim ïoh shuh ïa ka hok laitluid jong ki ban kren shaphang ka Gau Mata ne ban pynbna ïa ka masi kum ka kmie jong ka Ri ha ka 2 tarik Risaw ha Shillong.
Kane ka kynhun ka la pan jingbit na ka Shillong Press Club ban pynlong ka jingkren halor ka Gau Dhwaj Sthapana Bharat Yatra, ha ka por 1 baje mynsngi. Hynrei namar ba kim shym la poi ha ka por haduh 2 baje, na ka liang ki nongïalam ka SPC ruh ki la phone noh ïa ki ban kylli, pynban ki la ong ba ki dang slem namar ba ym pat poi uta u nongïalam jong ki uba lah ban poi miet katba ha ka ‘video’ ba ki la pyllait ki la kynnoh kylla ïa ka SPC.
Kane ka kynhun hapoh ka jingïalam jong u Jagatguru Shankaracharya Swami Avimuktesh-waranda Saraswati ka la thmu ban pynbna lyngba ki lad pathai khubor ba kan pynlong ïa ka Gau Dhwaj ban pynbna ba ka masi ka dei ka kmie jong ka ri India ha Shillong ha ka 2 tarik Risaw ban wan.
Na ka liang ka Shillong Press Club ka la kyntait ïa kane ka jingkynnoh ki Sadhu bad pynpaw ba ïa ka ‘press conference’ ne ka jingïakynduh bad ki lad pathai khubor la pynsangeh hi da ma ki namar ka jingbym lah ban poi katkum ka por.
Lah ban kdew ruh ba halor kane ka jingthmu jong katei ka kynhun na ka liang ki nongïalam bad dkhot ka Hynñiewtrep Youths’ Council ka la poi hakhmat ka khyrdop jong ka Shillong Press Club da ka jingthmu ban ïakynduh ïa kine ki briew bad pyrshah ïa kane ka jingthmu jong ki.
Ha kawei pat ka liang, ka Shillong Press Club ka kwah ban pynsngew ba ka Club ka dei ka kynhun kaba laitluid bad kaba khlem shah liang ha kaba uwei-pa-uwei u briew bad ka kynhun, khlem da kheiñ ïa ka jaidbynriew, ka jingngeit, ka shnong ka thaw, ka kolshor, bad ka niam la pdiang sngewbha ban pynlong ïa ka jingïalang bad ki nongthoh khubor halor kino-kino ki mat.
U President ka SPC Bah D Siangshai u la ong, ka jingdon jong ki pulit bad ki nongïalam bad ki dkhot jong ki seng treimon sngewbha ha kane ka sngi ka pynhiar dor ïa ka iktiar bad ka jinglong ba janai jong ka Shillong Press Club, kat haduh ba la kynnoh ïa ka Club ba ka la pynsangeh noh ïa katei ka jingïalang pathai khubor kaba la thmu ban pynlong.
