Shillong, Nailur 12
Ki dkhot ka Hynñiewtrep Youths’ Council (HYC) hapoh jingïalam u President, Bah Roykupar Synrem, ki la leit rah placard hakhmat ka khyrdop jong ka Shillong Press Club ban pyrshah ïa kawei ka seng kaba kyrteng Shankaracharya Swami Avimuktesh-warananda Araswati hapoh ka jingïalam u Brahmachari Mukundanad Maharaj kaba thmu wan ai jingpynbna ban ïalap khang bam dohmasi ha kylleng ka ri India.
Ki dkhot HYC kiba don palat 30 ngut ki la wan poi ha Shillong Press Club ha ka por 12: 00 baje mynsngi shwa ban poi ka kynhun ban ïalap pyrshah bam dohmasi kaba la buh por ha ka 1:00 baje mynsngi.
Kumjuh ruh ki pulit kiba la ïoh jingtip ki la wan poi ban ym mih kano-kano ka huri-hura hapdeng kine ar kynhun.
U Bah D Siangshai uba dei u President ka Shillong Press Club u la hap ban wan ïathuh sha ki dkhot ka HYC ba na ka liang ki briew jong kane ka kynhun ki la pyntip ba ki la pynsangeh noh ïa ka jingïakynduh bad ki nongthoh khubor bad dei hangne ba ki dkhot HYC ki la sangeh noh ban rah placard.
Haba ïakren bad u Bah Roykupar Synrem u la ong, ka seng ka la buddien la slem ïa kine ki briew namar ki la wan na kylleng ki jylla shatei lam-mihngi ban leit ïakynduh ïa ki nongthoh khubor ha Arunachal Pradesh bad Nagaland ban pynsngew ba ka ri India kan sangeh noh ban bam dohmasi.
U la ong ba kane ka jingwan rah placard hakhmat ka Shillong Press Club namar kine ki briew kin sa pynbna ban pynlong jingïaid paidbah ha Shillong dei na kata ka daw ki wan bad kwah ïakynduh ïa kine ki nongïalam.
“Kumba ka sorkar Nagaland ka la khang ban ym shah ïaid paidbah da kane ka seng pyrshah bam dohmasi, ngi kyntu ïa ka sorkar Meghalaya ba kam dei ban shah ïa ki ban ïaid paidbah ha Shillong,” u la ong.
U la ong ba ha jylla Meghalaya kumba 95 persen ki briew ki bang ban bam dohmasi, namarkata kim dei ban wan pynbor ban khang bam doh masi.
Ha kajuh ka por u Bah Roykupar u la ong lada kine ki briew ki ïaid shakhmat ban pyrshah bam dohmasi ka seng ruh kan ïaid lang ban bam dohmasi.
U la pynpaw ba ha Meghalaya ki briew ki don la ka jong ka jingngeit hynrei ki imsuk imsaiñ hynrei kine ki briew ki thmu ban pynïapher niam tang namar ka dohmasi.
