Cairo, Nailur:
Ka Hamas ha ka Sngi Balang ka la pynbna ia ka jingmynjur ban sangeh ia ka thma lane ka jingiakynad bad ka Israel lada ka Israel kam shym kylla ia ki jingiakut kumba la dep pynbeit ha ki por ba la leit.
Ka Hamas ka la iathuh ba ki dkhot ba kyrpang jongka, hapoh ka jingialam jong u heh Khalil al-Hayya, ki la ioh ban iakynduh ia ki nongialam ka pyrthei kyntheup ia u Myntri Rangbahduh ka Qatar- u Sheikh Mohammed bin Abdulrahman Al Thani bad u heh ka tnat wad bniah jong ka Egypt- u Abbas Kamel hapoh Doha, ban iakren halor ki jingdonkam bad ki mat ba kongsan haba iadei bad ka jinglong- jingman hapoh Gaza.
Namar la ong ba ka jingiakren iasuk bad ban sangeh thma, ki la shu pulom mynta la 11 bnai ba ka thma ka la neh bad na ka liang ka Hamas bad ka Israel kim lah ban iabeit ia ki jingpynbeit ba la wanrah da ka US, Egypt bad Qatar naka bynta ban ioh pynkut noh ia ka thma hapoh Gaza.
