Washington, Nailur:
U Secretary kam bar ri jong ka U.S., U Antony Blinken, ha ka Sngi Ba-ar, u la dawa ban pynkylla ïa ka rukom treikam jong ki shipai ka Israel ha West Bank bad u la pynrem ruh halor ka jingshah siat ïap jong ka nongïakhih pyrshah jong ka America, ha kaba ka Israel ka iathuh ba ka dei kaba shu jia ryngkhat bad bakla siat.
Ka Aysenur Ezgi Eygi, 26 snem ka rta, kaba dei ruh ka nong Turkey ka la shah siat iap ha ka Sngi Thohdieng jong ka taiew ba la dep ha ka jingiaid paidbah ha Beita; ka shnong kaba don marjan bad ka Nablus ha kaba ki nong Palestine ki la shah thombor bunsien ha ki Jiw kiba wan buhai shnong kaba don sha ka liang kadiang.
Ki shipai jong ka Israel ki la ong ha ka jingtohkit ba nyngkong ka la lap ba ka lah ban long ba ki shipai jong ka Israel ki la kum siat ia katei ka briew hynrei ba ka jingiap jong ka, ka dei kaba khlem da thmu. Na ka liang ka tnat shipai Israel ruh ka la pynpaw ia ka jingsngewkhia kaba jur haba iadei bad kane ka jingjia.
Ha ki jingkynthoh bad jingpynrem jur jong u haduh mynta haba kynthoh ïa ki bor pahara jong ka Israel- kaba long ka paralok ba jan tam eh jong ka US ha Middle East, u Blinken u la ong ba ka jingshah siat iap jong ka Eygi, ka long ka bym don daw bad ka bym don nongrim haei-haei ruh. Kumta u la maham ba ka Israel ka dei ban pynkylla ia ki rukom treikam bad rukom pahara jong ki shipai bad ki bor pahara jongka ha West Bank lym kumta, baroh ki mynsiem lui-lui kin shu iap ei ha ka kti ki shipai Israel.
U nongaiktien jong ka sorkar Israel, u la kyntait ban kren eiei halor katei ka jingkren jong u Blinken. Hynrei ka tnat shipai Israel ka la ong ba ka jingtohkit da ka tnat tohkit, ka dang iaid shakhmat bad ia ki jinglap jongka yn sa aiti sha ka jingbishar bniah kaba kham halor ynda la dep.
