Imphal, Nailur:
Ki la don kumba 40 ngut ki nongïakhih kiba la shah kem ha ki pulit ha ka por ba la mih ki jingïakynad ha Manipur halor ka jingpynkheiñ jong ki ïa ki kyndon ha kaba ïadei bad ka jingïakhih jong ki wat lada la nang ïai buh ki jingmaham pyrshah halor kane.
Ki pulit ha ka miet jong ka sngi Balang ki la ïathuh ba ki la kem ïa ki 33 ngut ki nongïakhih na kiba bun ki thaiñ katba 7 ngut kiba dang poh rta ki la shahkem naba ki la pynkheiñ kyndon ha ka por ba la don ka jingïakhih naduh ka Lah Sngi U Blei.
Kumba la ïathuh ka tyllong khubor, la ong ba kiba bun na kine ki nongïakhih ki dei ki samla pule, kiba la kawang maw ïa ka Raj Bhawan ha ka Lah Sngi U Blei bad ka sngi Ba-ar. Ha ka por ba don ka jingshah thombor ïa ka Raj Bhawan, u Lat u Lakshman Prasad Acharya u la mih ban leit sha Guwahati ha ka Sngi Balang.
U Acharya u la long ruh u Lat jong ka Assam. Ki pulit jong ka Manipur ki la kyntu ïa ki riewpaidbah ba kim dei ban pynkheiñ ïa ki kyndon bad ba ki la dei ban ïatreilang bad ki bor jong ka aiñ.
Ka jinglong jingman ha Manipur ka dang shah ktah jur hynrei la lah ban tehlakam ha ka Sngi Balang haba ki samla pule ki la ïakynad bad ki bor pahara ha ka jingïaid paidbah jong ki sha Raj Bhavan shi sngi shwa kane, la ïathuh ki pulit.
Ïa ka Curfew kaba la pynjari ha ka nongbah Imphal, ha ka por shiteng sngi jong ka Sngi Ba-ar, la bteng haduh ba la thoh ïa ka khubor, ha ryngkat ka jingpynjur shuh shuh ïa ki bor pahara bad ka jingpahara ba khlem sangeh da ki pulit, kane ka long shi bynta ban lait na kino kino ki jingjia ba sngewsih, la ong uwei u heh ophisar. “Ka jinglong jingman ka dang shah ktah hynrei ka dang don hapoh ka jingshah tehlakam,” u la ong.
Ka jingïakynad ka la mih hapdeng ki samla pule bad ki bor pahara ha ka jingïaid paidbah sha Raj Bhavan ha ka sngi Ba-ar. Ha ka janmiet jong kane ka sngi, ka sorkar ka la pynmih ïa ka hukum ba la pynkylla kaba la ong ba ïa ka jingpynsangeh treikam ïa ka Internet haba la ïohi ba ka jingïakhih jong ki samla pule ka la nangpur bad nangjur yn pyntreikam tang ha ki san tylli ki distrik kiba don ha ka jaka them.
Ki samla pule kiba la pynlong ïa ka jingïakhih ki la pyrshang ban ïaid paidbah sha Raj Bhavan ha Imphal ban pynjur ïa ki jingdawa jong ki ban weng noh ïa u DGP bad u nongai jingmut ha ka liang ka jingpahara jong ka sorkar jylla.
Ki pulit ki la siat da ki bom pynsat khmat khnang ban pynpra ïa ka kynhun jong ki samla pule kiba la pynlong ïa ka jingïakhih ha kaba ki la kawang maw pyrshah ïa ki bor pahara ha Khwairamband bad Kakwa Naorem Leikai ki thaiñ kiba don ha ka nongbah jong ka jylla. Ki la don palat 55 ngut ki samla pule ki la mynsaw ha kitei ki jingïakynad bad kine ki la shah sumar ha ka hospital RIMS, la pynshisha ka kynhun jong ki samla pule.
Ka Raj Bhavan, ha ka kyrwoh kaba la pynmih ha ka miet jong ka sngi Ba-ar, ka la ong, “Ki nongmihkhmat jong ki samla pule, ki la ïakynduh ïa u Lat ka jylla, u Lakshman Prasad Acharya bad ki la ai ïa ka dorkhas.” “Ki la kyntu ïa u Lat ba un shim ïa ki sienjam kiba ïadei dur ban pynurlong ïa ki jingdawa jong ki, la ong ka tyllong khubor. U Lat u la pynthikna ïa ki ba un shim ïa ki sienjam na ka bynta ka jingbha jong ki samla pule bad ki paidbah ka Manipur, “la ong ka kyrwoh khubor.
Katba ki jingkhynra bad ka jingpyntreikam kiba ïadei bad ki kyndon jong ka aiñ ki dang ïai bteng ha Kangpokpi distrik bad la ïoh ban kurup ïa ki tiar siat bad ki tiar pynbthei, la ong ki pulit ha ka kyrwoh khubor.
