Shillong, Nailur 12
Ka thaiñ Eastern Ri Bhoi kan sa ïoh noh ïa ka madan ïalehkai ka ban siang da u phlang plastik (artificial turf) ha madan Kurkalang kaba ha Bhoirymbong khnang ba kan long ka jingmyntoi na ka bynta ki khynnah ïalehkai kiba don sap ha ka jingïalehkai phutbol.
Ïa kane la pynthikna da u MLA ka thaiñ u Bah Damanbait Lamare hadien ba la kut ka jingïalehkai final jong ka 63rd Subroto Cup International Foot-ball Tournament 2024 ha kaba ka Mynken Chris-tian Higher Secondary School ka la mad ïa ka jingshah rem noh ha ka T.G English School kaba na Manipur lyngba ka jingïashut tie-breaker da 4-3 kol ha ka Sngi Balang ha Dr. Ambedkar Stadium kaba ha ka nongbah Delhi.
Kumba ka paw la bun tylli ki snem ba na ka liang ki bor Sorkar ki la wan jurip ïa katei madan na ka bynta ban tei ïa ka stadium kaba paka, hynrei kat haduh mynta kam shym la urlong. Dangshen na ka liang ki bor pynïaid shnong ki la pynpaw ïa ka jingsngew bynñiaw halor ka jingbym lah ban pynurlong ka Sorkar Jylla na ka bynta ban pynïoh ïa ka madan ïalehkai kaba paka.
Haba ïakren bad u Damanbait ha ka Sngi Balang ha nongbah Delhi, u la pynpaw ba u la ïoh ban pynsngew hakhmat ka Sorkar MDA 2.0 bad kumjuh ha u Myntri ka tnat ïalehkai u Bah Shakliar Warjri halor ka jingdonkam ban ïoh noh ïa ka madan ba paka ha ka thaiñ Ri Bhoi. “Kumba ka long mynta ka thaiñ Eastern Ri Bhoi kam pat don ïa ka madan ïalehkai phutbol kaba paka bad ngi la donkam shisha ïa ka madan kaba biang kumba long lem kiwei ki district jong ka Jylla.”
“Hynrei ngi sngewkmen mynta na ka liang ka tnat ïalehkai ka la wan thew wan woh ïa ka jingheh jong ka jaka ha Kurkalang bad ngi khmih lynti ba kane kam kan sa urlong noh shen.”
Haba kylli halor ka jinglut jingsep na ka bynta kane ka projek, u Bah Damanbait u la ong, “Ïa mynta ngam pat lah ban ong haduh katno la mang pisa, hynrei ka lah ban kot ym duna ïa ka T. 20 klur tyngka namar kane ka jingsiang ïa ka madan phlang plastic kan kynthup lang ruh ïa ka athletic track.
Ha kawei pat ka liang utei nongmihkhmat na Umroi Constituency u la pynpaw ka jingai khublei ïa ka kynhun ïalehkai jong ka Mynken Christian Higher Secondary School kaba la shah rem noh ha ka final jong ka lympung Subroto Cup. “Kane ka kynhun ka la lah lah ban ïalehkai bha naduh kaba sdang, hynrei ha ka jingïalehkai ka don ka jingrem bad ka jingjop ïa kaba ngi hap ban pdiang ïa kata. Hynrei ngi kyrmen ba kane ka kynhun kan dang ïai trei shitom biang sa shisien pat khnang ba kan lah ban pynurlong ha ki snem ki ban wan.”
